Toshkent viloyati Yuqori Chirchiq tumanida avtomashinani olib qochib, uni metallolomga topshirib yuborgan shaxs ushlandi.
IIV huzuridagi Tergov departamenti matbuot xizmatining ma’lum qilishicha, voqea 30-martdan 31-martga o‘tar kechasi yuz bergan. Yuqori Chirchiq tumani Bunyodkor ko‘chasida yashovchi 27 yoshli T.B. 69 yoshli S.S.ga tegishli “VAZ-2101” rusumli avtomashinasini uyining oldida, eshiklarini ochiq va kalitini o‘t oldirish joyida qoldirgan. Bundan foydalangan noma’lum shaxs uni olib qochib ketgan.
Mazkur holat yuzasidan Yuqori Chirchiq tuman IIB huzuridagi TB tomonidan nomaʼlum shaxsga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.
Olib borilgan tergov-tezkor harakatlar natijasida, mazkur jinoyatni 20 yoshli R.M. sodir etgani, davlat raqam belgilarini yechib, Yuqori Chirchiq tumani “Farovon” mahallasida joylashgan xonadonga olib borib 2 million so‘m pul evaziga metallolom sifatida sotib yuborgani aniqlangan.
Mazkur xonadon ko‘zdan kechirilganda, jabrlanuvchiga tegishli avtomashina qismlarga bo‘lingan holatda ashyoviy dalil tariqasida rasmiylashtirib olingan.
Hozirda gumonlanuvchiga nisbatan qamoqqa olish tarzidagi ehtiyot chorasi qo‘llangan, tergov harakatlari olib borilmoqda.
Ma’lumot uchun, transport vositasini olib qochganlik uchun Jinoyat kodeksida eng yuqori jazo sifatida 5 yildan 10 yilgacha ozodlikdan mahrum qilish jazosi belgilangan.
Izoh (0)