Sog‘liqni saqlash vazirligi tashabbusi bilan O‘zbekistonda ilk bor “Bolaning sog‘lom ovqatlanish haftaligi” boshlandi. Bu haqda vazirlik axborot xizmati xabar berdi.
Qayd etilishicha, 19—29-aprel kunlari bo‘lib o‘tadigan mazkur haftalik doirasida 208 ta ko‘p tarmoqli markaziy poliklinika, 1049 ta oilaviy poliklinika, 1080 ta oilaviy shifokor punktining 17,3 mingta tibbiy brigadalari va 34,6 ming nafar patronaj hamshiralari tomonidan 1 million 878 ming nafardan ziyod 6-23 oylik bolalar uchun uy sharoitida tayyorlanadigan ovqatlarni boyitish maqsadida mikronutriyent kukunlari topshiriladi.
Unga ko‘ra, har bir tibbiy brigada tomonidan 6-23 oylik bolalar ro‘yxatlari asosida mikronutreint kukunlarini onalarga yetkazish va uni uy sharoitida tayyorlash bo‘yicha individual mashg‘ulotlar o‘tkaziladi.
“6 oydan 23 oygacha bo‘lgan davrda bolaning sog‘lom va aqliy rivojlanishi uchun temir, A, C, B6 vitamini, yod, sink, folat kabi mikroelementlar juda muhim. Shu sababli vazirlik tomonidan yurtimiz bo‘ylab ”Bolaning sog‘lom ovqatlanish haftaligi“ tashkil etildi”, — deydi Sog‘liqni saqlash vaziri o‘rinbosari Elmira Bositxonova.
Mazkur o‘n kunlik davomida davlat tomonidan ajratilgan 50 milliard so‘m mablag‘ evaziga xarid qilingan va bolalarning oziqlanishida yetishmaydigan faol biologik qo‘shimchalardan iborat 2 million qutiga yaqin dori-darmonlar har bir hududga belgilangan talabnoma asosida yetkazib beriladi.
Shuningdek, haftalik davomida yosh onalar va bolaning oila a’zolari bilan 6 oylikkacha go‘daklarni mutlaq ona suti bilan boqishning ahamiyati hamda 6 oylikdan boshlab chaqaloqlarni qo‘shimcha ovqatlar bilan to‘g‘ri ovqatlantirish va ularni parvarishlash bo‘yicha suhbatlar o‘tkazish rejalashtirilgan.
Targ‘ibot ishlari Sog‘liqni saqlash vazirligi tomonidan tayyorlangan “Bir yoshgacha bolalar ovqatlanishi” va “Bolani parvarishlash va rivojlanishi uchun uslubiy qo‘llanmalar" asosida tashkil etiladi.
Bundan tashqari, tibbiyot brigadalari uchun Jahon sog‘liqni saqlash tashkilotining “Go‘dak hayotining dastlabki 1000 kunligi” mavzusida bolani to‘g‘ri ovqatlantirish va ko‘krak suti bilan boqishning ahamiyatiga bag‘ishlangan seminarlar o‘tkazish ham ko‘zda tutilgan.
Izoh (0)