Latviyada 9-may kuni Yevropa kuniga bag‘ishlangan tadbirlardan tashqari har qanday ommaviy tadbirlarni o‘tkazish taqiqlandi. Bu haqda mahalliy nashr xabar berdi.
Tegishli qonun Latviya Seymi tomonidan ikki o‘qishda qabul qilindi. Bungacha deputatlar 9-mayni Ukrainadagi urushda halok bo‘lganlar va jarohatlanganlar uchun Xotira kuni deb e’lon qilishi mumkinligi taxmin qilingandi, ammo yakunda boshqacha qaror qabul qilindi.
“Qonunning maqsadi davlat va jamiyat manfaatlarini himoya qilish, tartibsizliklarning oldini olish, jamiyat salomatligi va ma’naviyatini himoya qilishdir. Bundan tashqari, qonun Latviyaning demokratik va milliy davlat sifatidagi qadriyatlariga tahdid va kamsitishning, jumladan jamiyatning bo‘linishi, urush, harbiy bosqinchilik, totalitarizm va zo‘ravonlikni ulug‘lash, shuningdek, tarixiy voqealarni buzib ko‘rsatishning oldini olishga qaratilgan. Qaror Ukraina xalqi bilan birdamlik belgisi sifatida ham qabul qilindi”, — deyiladi xabarda.
Yangi qonunga ko‘ra, 9-may kuni mamlakatda pirotexnika vositalaridan foydalanish, shuningdek, bayram va ko‘ngilochar tadbirlar, kortejlar, yig‘ilish va piketlar o‘tkazish taqiqlanadi.
Izoh (0)