Kanadada islomofobiya chuqur ildiz otgan, mamlakatda diniy toqatsizlik asosida sodir etilgan jinoyatlar soni ko‘paygan. Bu haqda Kanada senati hisobotiga tayanib, Anadolu xabar berdi.
Kanada Senatining Inson huquqlari bo‘yicha qo‘mitasi mamlakatning turli hududlarida hujum va haqoratlarga uchragan bir guruh musulmonlar bilan uchrashuvdan so‘ng shunday xulosaga keldi.
Qo‘mita a’zolari mamlakatda islomofobiya ko‘rinishlarining o‘sish tendensiyalarini o‘rganish natijalarini aks ettiruvchi hisobot tayyorladi. Ommaviy foydalanish uchun hisobotning bir qismi e’lon qilindi, qolgani esa keyinchalik ochiqlanadi.
Hisobotda aytilishicha, Kanadada o‘ta o‘ng va musulmonlarga nisbatan nafratni namoyish qiluvchi guruhlar soni ortgan. Shunga ko‘ra, diniy toqatsizlik asosida musulmonlarga qarshi hujumlar soni oshgan.
Hisobot mualliflarining ta’kidlashicha, mamlakatda musulmonlarga nisbatan murosasizlik darajasi boshqa din vakillariga nisbatan ancha yuqori. Musulmonlarga qarshi voqealar boshqa diniy guruhlarga qilingan hujumlardan ko‘ra zo‘ravonroqdir.
Qo‘mita rahbari Salma Ataullaxyan jurnalistlarga mamlakatda islomofobiya tendensiyalari kuchayganini aytdi. Uning so‘zlariga ko‘ra, musulmonlarga qarshi hujumlarga ko‘pincha yosh bolalar guvoh bo‘ladi, bu ularning ruhiyatiga yomon ta’sir qiladi va keyingi avlodlar o‘rtasidagi nizolar uchun zamin bo‘lishi mumkin.
Ta’kidlanishicha, ko‘pincha musulmon ayollar diniy toqatsizlik asosidagi hujumlarga duchor bo‘ladi.
“Ba’zi ayollar uydan chiqishga qo‘rqib, farzandlarini maktabdan olib keta olmaydi. Ko‘pchilik tupurish ko‘rinishidagi haqoratga duch keladi. Musulmonlar ko‘chada ketayotganda doimo orqasiga qarashga majbur bo‘ladi”, — dedi u.
Kanada statistikasi tomonidan mart oyida e’lon qilingan hisobotga ko‘ra, to‘g‘ridan-to‘g‘ri politsiyaga xabar qilingan nafrat bilan bog‘liq jinoyatlar soni 2021-yilda 2020-yilga nisbatan 27 foizga oshgan, ya’ni 2,646 dan 3,360 gacha.
Musulmonlar tomonidan politsiyaga bildirilgan shikoyatlar soni 71 foizga o‘sgan. Kanadada 1 million 775 mingga yaqin musulmon istiqomat qiladi.
Ataullaxyan musulmonlarga qarshi hujumlar soni bu raqamlardan oshib ketganini aytmoqda. Biroq ko‘plab jinoyatlar haqida politsiyaga xabar berilmaydi.
Izoh (0)