Toshkent viloyati Yuqori Chirchiq tumanida olib qochilgan mashina metallolomdan topildi. Bu haqda Tergov departamenti axborot xizmati xabar berdi.
Xabarga ko‘ra, holat 30-martdan 31-mart kuniga o‘tar kechasi Yuqori Chirchiq tumani Bunyodkor ko‘chasida sodir bo‘lgan. Nomaʼlum shaxs ushbu ko‘chada yashovchi 27 yoshli T.B.ning boshqaruvida bo‘lgan VAZ-2101 rusumli avtomashina T.B.ning uyi eshigi oldida eshiklari ochiq va kaliti o‘t oldirish joyida qolganidan foydalanib, nomaʼlum tomonga olib qochib ketgani aniqlangan.
Mazkur holat yuzasidan Yuqori Chirchiq tuman IIB huzuridagi tergov bo‘linmasi tomonidan nomaʼlum shaxsga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.
Olib borilgan tergov-tezkor harakatlar natijasida mazkur jinoyatni 20 yoshli R.M. sodir etgani, davlat raqam belgilarini yechib, Yuqori Chirchiq tumani “Farovon” mahallasida joylashgan xonadoniga olib borib, 2 million so‘m pul evaziga metallolom sifatida sotib yuborgani aniqlangan. Mazkur xonadon ko‘zdan kechirilganda, jabrlanuvchiga tegishli avtomashina qismlarga bo‘lingan holatda ashyoviy dalil tariqasida rasmiylashtirib olingan.
Hozirda gumonlanuvchiga nisbatan qamoqqa olish tarzidagi ehtiyot chorasi qo‘llangan.
Jinoyat ishi doirasida gumonlanuvchining ko‘rsatmalaridan kelib chiqib, mazkur jinoyatga boshqa aloqador bo‘lgan shaxslarni aniqlashga qaratilgan chora-tadbirlar o‘tkazilib, huquqiy baho berilishi taʼminlanadi. Tergov harakatlari olib borilmoqda.
Izoh (0)