Тошкент вилояти Юқори Чирчиқ туманида олиб қочилган машина металлоломдан топилди. Бу ҳақда Тергов департаменти ахборот хизмати хабар берди.
Хабарга кўра, ҳолат 30 мартдан 31 март кунига ўтар кечаси Юқори Чирчиқ тумани Бунёдкор кўчасида содир бўлган. Номаълум шахс ушбу кўчада яшовчи 27 ёшли Т.Б.нинг бошқарувида бўлган ВАЗ-2101 русумли автомашина Т.Б.нинг уйи эшиги олдида эшиклари очиқ ва калити ўт олдириш жойида қолганидан фойдаланиб, номаълум томонга олиб қочиб кетгани аниқланган.
Мазкур ҳолат юзасидан Юқори Чирчиқ туман ИИБ ҳузуридаги тергов бўлинмаси томонидан номаълум шахсга нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.
Олиб борилган тергов-тезкор ҳаракатлар натижасида мазкур жиноятни 20 ёшли Р.М. содир этгани, давлат рақам белгиларини ечиб, Юқори Чирчиқ тумани “Фаровон” маҳалласида жойлашган хонадонига олиб бориб, 2 миллион сўм пул эвазига металлолом сифатида сотиб юборгани аниқланган. Мазкур хонадон кўздан кечирилганда, жабрланувчига тегишли автомашина қисмларга бўлинган ҳолатда ашёвий далил тариқасида расмийлаштириб олинган.
Ҳозирда гумонланувчига нисбатан қамоққа олиш тарзидаги эҳтиёт чораси қўлланган.
Жиноят иши доирасида гумонланувчининг кўрсатмаларидан келиб чиқиб, мазкур жиноятга бошқа алоқадор бўлган шахсларни аниқлашга қаратилган чора-тадбирлар ўтказилиб, ҳуқуқий баҳо берилиши таъминланади. Тергов ҳаракатлари олиб борилмоқда.
Изоҳ (0)