O‘zbekistonda chiqindidan tibbiy preparat ishlab chiqarish texnologiyasi ixtiro qilindi

O‘zbekistonda ishlab chiqarish chiqindilaridan tibbiyot uchun magniy sulfat ishlab chiqarish texnologiyasi yaratildi va ro‘yxatdan o‘tkazildi.

Fanlar akademiyasi boshqarma boshlig‘i Feruza Karimova ilmiy tashkilotlarning yangi ishlanma va texnologiyalarni yaratish hamda joriy etish bo‘yicha amalga oshirgan ishlari haqida ma’lumot berdi.

Ma’lum qilinishicha, konstruktorlik byurosi va tajribaviy ishlab chiqarish ilmiy texnik markazi “Urofloumetr UFM-01” tibbiy uskunani ishlab chiqardi. Bu uskuna uroflovometr bemorlarda urodinamikani o‘lchash parametrlari uchun mo‘ljallangan.

Ion-plazma va lazer texnologiyalari institutida Dermatologiya klinik amaliyotida qo‘llash uchun lazer texnologiyalari va UB-yorug‘lik manbalari asosidagi fototerapevtik qurilmaning yangi avlodi ishlab chiqildi. Mazkur fototerapevtik qurilma Respublika teri-tanosil klinik kasalxonasida va “Dermatolog Saidkosim Arifov” xususiy klinikasida vitiliga va psoriaz kassaliklarini ayrim shakllarini davolashda qo‘llanildi.

Import o‘rnini bosish yo‘nalishida Polimerlar kimyosi va fizikasi instituti tomonidan yuqori darajada tozalangan karboksimetilsellyuloza texnologiyasi ishlab chiqildi va yuqori darajada tozalangan KMS yangi markasi yaratildi. Mahsulot ishlab chiqarilishi “Promxim Impex” mas’uliyati cheklangan jamiyat korxonasi bazasida amaliyotga joriy etildi va dastlabki tajriba sinov partiyalari ishlab chiqarildi. Ishlab chiqarilgan mahsulot oziq-ovqat, farmasevtika va boshqa sohalarda qo‘llanilishga ruxsat etildi.