Birlashgan Millatlar Tashkiloti bosh kotibi o‘rinbosari Amina Muhammadning aytishicha, ikki haftadan so‘ng BMT rahbari Antoniu Guterrish mamlakatlarning Afg‘oniston bo‘yicha maxsus vakillari bilan uchrashuv o‘tkazadi. Bu haqda “Daryo”ning Afg‘onistondagi muxbiri xabar berdi.
AQSHning Prinseton universitetida bo‘lib o‘tgan anjumanda Amina Muhammad “Tolibon” bilan o‘zaro aloqa o‘rnatish zarurligini ta’kidladi va “Tolibon”ni tan olish ushbu harakat a’zolariga masʼuliyatliroq bo‘lishga yordam berishini aytdi.
“Umid qilamizki, ushbu uchrashuvda prinsiplar va shartlarga asoslanib, ‘Tolibon’ni tan olish yo‘lida dastlabki qadamlar aniqlanadi”, — dedi Muhammad Amina xonim:
Uning qo‘shimcha qilishicha, “Tolibon” dunyo miqyosida tan olinishiga qattiq intilmoqda, bu esa harakatga ta’sir o‘tkazish uchun qo‘l keladi. BMT vakiliga ko‘ra, bu uchrashuv tashkilot bosh kotibining Afg‘oniston bo‘yicha mintaqa va dunyo mamlakatlari vakillari bilan ilk uchrashuvi bo‘ladi.
Aminaning taʼkidlashicha, “Tolibon” bilan aloqa o‘rnatmaslik ularning “yomonroq qarorlar” qabul qilishiga sabab bo‘ladi, dunyo davlatlari esa “Tolibon” hukumatining kuchsizligi tufayli Afg‘onistonda yana ko‘proq notinchliklar yuz berishini istamaydi.
“Tolibon”ga koronavirus kabi munosabatda bo‘lishingizni so‘rar edim, biz ularning nima qilmoqchiligini oldindan bilmaymiz”, — qo‘shimcha qildi Amina Muhammad.
BMT vakilining ushbu so‘zlari Afg‘onistonda salbiy kutib olindi.
18-aprel kuni BMT agar “Tolibon” ayol xodimlarga ushbu tashkilotda ishlashga ruxsat bermasa, Afg‘onistonni “tark etishi” haqida ogohlantirgan edi.
Izoh (0)