Самарқанд вилояти Каттақўрғон туман ободонлаштириш бошқармаси томонидан қурилиш материаллари сотиб олиш учун 30 миллион сўмлик тендер ўтказилди. “Дарё” мухбири лот маълумотларини кўздан кечириш жараёнида шубҳали ҳолатга дуч келди.
Тендер 10—17 апрель кунлари ўтказилган. Унда Каттаминг қишлоғига пиёдалар йўлакчаси қуриш учун қурилиш материаллари етказиб бериш хизмати ўйналган. Лотнинг бошланғич нархи 30 миллион сўм этиб белгиланган.
Харид савдоларида учта корхона қатнашган бўлиб, “Ustazoda Stroy” МЧЖ ғолиб деб топилган, “Polvontepa Mega Stroy” МЧЖ эса захира етказиб берувчи сифатида кўрсатилган.
Иштирокчи корхоналарнинг раҳбарияти ҳақидаги маълумотлар кўздан кечирилганда ғолиб “Ustozoda Stroy” корхонасининг таъсисчиси ва раҳбари Эргашев Адҳам Баҳодирович экани маълум бўлди. Эътиборлиси, унга рақобатчилик қилган “Polvontepa Mega Stroy”нинг раҳбари Эргашев Ҳасан Баҳодирович бўлиб, бу икки корхона раҳбарларининг қариндошлик алоқалари мавжуд бўлиши мумкин. Бундан ташқари, корхоналарнинг телефон рақамлари ҳам бир хил. Шунингдек, тадбиркорлик субъектларининг юридик манзиллари ҳам бир туман (Каттақўрғон)да жойлашган.
“Дарё” мухбири ҳолат юзасидан изоҳ олиш мақсадида иштирокчи корхоналарнинг телефон рақамига қўнғироқ қилди. Ўзини Эргашев Ҳасан деб таништирган шахс рақобатчиси Эргашев Адҳам аммасининг ўғли эканини, улар иккиси алоҳида корхоналарга раҳбарлик қилиши ва шерикчилик алоқалари йўқ эканини айтди.
Изоҳ (0)