Saudiya Arabistoni valiahd shahzodasi Muhammad bin Salmon Saudi Aramco neft kompaniyasining qariyb 78 milliard dollarlik 4 foiz ulushini mamlakat suveren jamg‘armasiga o‘tkazdi. Bu haqda Saudiya Arabistoni hukumati bayonotiga tayanib, The Wall Street Journal xabar bermoqda.
Kelishuv natijasida Saudiya Arabistoni hukumatining dunyodagi eng yirik neft eksportchisidagi ulushi 90,18 foizgacha kamayadi.
Saudi Aramco kelishuvning kompaniya faoliyati, strategiyasi yoki Saudiya hukumati uchun asosiy moliya manbai bo‘lgan dividendlar taqsimotiga ta’sir qilmasligini aytdi.
Bu Muhammad bin Salmon Saudi Aramco aksiyalarini suveren fondga birinchi marta o‘tkazayotgani emas. O‘tgan yilning fevral oyida u, shuningdek, neft kompaniyasining foniga 4 foizni berdi. O‘sha paytda uning qiymati 80 milliard dollarga teng edi.
Kelishuv fondning 2025-yilga borib boshqaruv ostidagi aktivlarini 1 trillion dollardan ortiqroqqa oshirish rejasining bir qismi edi.
Saudiya Arabistoni Suveren Jamg‘armasi neft eksporti bilan bog‘liq bo‘lmagan kompaniyalar va tarmoqlarga moliyaviy yordam ko‘rsatish uchun mamlakat iqtisodiyotini diversifikatsiya qilish dasturi doirasida tashkil etilgan.
Jamg‘arma, xususan, Neom loyihasiga sarmoya kiritdi. Uning bir qismi sifatida Muhammad bin Salmon Qizil dengizning shimoli-g‘arbiy sohilidagi mintaqani yuqori texnologiyalar foydasiga neft iqtisodiyotidan voz kechish, ijtimoiy cheklovlarni yumshatish va xorijiy investitsiyalarni ko‘paytirish haqidagi qarashlarini o‘zida mujassamlashtirgan texnologik markazga aylantirmoqchi.
Neomning tarkibiy qismlaridan biri bu Qizil dengiz qirg‘og‘idan Tabuk provinsiyasi poytaxtigacha 170 kilometrga cho‘zilishi kerak bo‘lgan chiziqli metropol — The Line.
Kelajak shahrida yo‘llar va mashinalar bo‘lmaydi, barcha transportlar yer osti va yuqori tezlikda bo‘ladi. The Line 2024-yildan boshlab aholi va sayyohlarni qabul qila boshlaydi.
Avvalroq Saudi Aramco’ning daromadi neft bozorida yana bir rekord o‘rnatgani haqida xabar berilgandi.
Izoh (0)