Yil boshidan beri O‘zbekistonda tovar eksporti hajmining qanday o‘zgargani o‘rganildi. Bu haqda “Daryo”ga Iqtisodiy tadqiqotlar va islohotlar markazi xabar berdi.
Yil boshidan buyon tovarlar eksporti hajmi o‘tgan yilning shu davriga nisbatan 5,2 foizga o‘sdi.
Eksportning o‘sishi Sirdaryo (41,6 foiz), Andijon (35,6 foiz), Xorazm (34,9 foiz), Navoiy (18,7 foiz) va Qashqadaryo (16,6 foiz) viloyatlarida va Toshkent shahrida (12,1 foiz) kuzatildi.
O‘zbekiston eksport hajmining o‘sishi oziq-ovqat mahsulotlari, sanoat tovarlari, kimyoviy moddalar va qishloq xo‘jaligi mahsulotlari eksportining o‘sish sur’atlari bilan izohlanadi.
Eksport hajmining qisqarishi Farg‘ona (23,3 foiz), Toshkent (7,7 foiz), Buxoro (6,9 foiz), Jizzax (6,3 foiz), Surxondaryo (5,3 foiz) va Samarqand (4 foiz) viloyatlari hamda Qoraqalpog‘iston Respublikasida (15,2 foiz) qayd etildi.
Eksport hajmining kamayishi Farg‘ona va Jizzax viloyatlarida — ip-kalava eksportining qisqarishi, Toshkent viloyatida — metall va undan tayyorlangan mahsulotlar eksportining qisqarishi, Buxoro viloyatida — paxta tolasining ichki bozorga yo‘naltirilishi, neft va neft mahsulotlari eksportining qisqarishi bilan izohlanadi.
Shuningdek, Surxondaryo viloyatida — ip-kalava va to‘qimachilik mahsulotlari eksportining qisqarishi, Samarqand viloyatida — ip-kalava va meva-sabzavot mahsulotlari eksportining qisqarishi, Qoraqalpog‘istonda esa plastmassa va undan tayyorlangan mahsulotlar hamda ip-kalava eksporti qisqarishi bilan bog‘liq.
Avvalroq O‘zbekiston va Xitoy o‘rtasida tashqi savdo aylanmasi so‘nggi yillarda qanday o‘zgargani haqida xabar berilgandi.
Izoh (0)