Саудия Арабистони валиаҳд шаҳзодаси Муҳаммад бин Салмон Saudi Aramco нефть компаниясининг қарийб 78 миллиард долларлик 4 фоиз улушини мамлакат суверен жамғармасига ўтказди. Бу ҳақда Саудия Арабистони ҳукумати баёнотига таяниб, The Wall Street Journal хабар бермоқда.
Келишув натижасида Саудия Арабистони ҳукуматининг дунёдаги энг йирик нефть экспортчисидаги улуши 90,18 фоизгача камаяди.
Saudi Aramco келишувнинг компания фаолияти, стратегияси ёки Саудия ҳукумати учун асосий молия манбаи бўлган дивидендлар тақсимотига таъсир қилмаслигини айтди.
Бу Муҳаммад бин Салмон Saudi Aramco акцияларини суверен фондга биринчи марта ўтказаётгани эмас. Ўтган йилнинг февраль ойида у, шунингдек, нефть компаниясининг фонига 4 фоизни берди. Ўша пайтда унинг қиймати 80 миллиард долларга тенг эди.
Келишув фонднинг 2025 йилга бориб бошқарув остидаги активларини 1 триллион доллардан ортиқроққа ошириш режасининг бир қисми эди.
Саудия Арабистони Суверен Жамғармаси нефть экспорти билан боғлиқ бўлмаган компаниялар ва тармоқларга молиявий ёрдам кўрсатиш учун мамлакат иқтисодиётини диверсификация қилиш дастури доирасида ташкил этилган.
Жамғарма, хусусан, Neom лойиҳасига сармоя киритди. Унинг бир қисми сифатида Муҳаммад бин Салмон Қизил денгизнинг шимоли-ғарбий соҳилидаги минтақани юқори технологиялар фойдасига нефть иқтисодиётидан воз кечиш, ижтимоий чекловларни юмшатиш ва хорижий инвестицияларни кўпайтириш ҳақидаги қарашларини ўзида мужассамлаштирган технологик марказга айлантирмоқчи.
Neom’нинг таркибий қисмларидан бири бу Қизил денгиз қирғоғидан Табук провинцияси пойтахтигача 170 километрга чўзилиши керак бўлган чизиқли метропол — The Line.
Келажак шаҳрида йўллар ва машиналар бўлмайди, барча транспортлар ер ости ва юқори тезликда бўлади. The Line 2024 йилдан бошлаб аҳоли ва сайёҳларни қабул қила бошлайди.
Аввалроқ Saudi Aramco’нинг даромади нефть бозорида яна бир рекорд ўрнатгани ҳақида хабар берилганди.
Изоҳ (0)