“Chinoz neftni qayta ishlash zavodi” ustav kapitalidagi davlat ulushini xususiylashtirish jarayonining majburiyatga ega bo‘lgan takliflarni (BO) qabul qilish muddati uzaytirildi.
Davlat aktivlarini boshqarish agentligi joriy yil 7-martdagi “Chinoz neftni qayta ishlash zavodi” ustav kapitalidagi 100 foiz davlat ulushini sotib olish bo‘yicha tanlov e’lon qilgandi.
Davaktiv agentligi savdo jarayonlarida ishtirok etayotgan salohiyatli talabgorlarning so'roviga muvofiq majburiyatga ega bo‘lgan takliflarni qabul qilish bosqichi 1 oyga uzaytirilganini ma’lum qildi.
Mosaic Financial kompaniyasi ushbu bitim yuzasidan Agentlikning xususiylashtirish bo‘yicha maslahatchisi sifatida jalb qilingan.
Zavodni xususiylashtirish jarayoni 2022-yilning avgustida boshlangan edi.
Zavod haqida ma’lumot
“Chinoz neftni qayta ishlash zavodi” – asosiy vazifasi neftni qayta ishlab benzin, kerosin, mazut, dizel yoqilg‘isi va moylarga aylantirishni tashkil etishdan iborat.
Ushbu sanoat korxonasi yiliga 117 ming tonnadan ziyod uglevodorod xomashyosini qayta ishlash imkonini beruvchi zamonaviy texnologik uskunalar bilan jihozlangan.
Korxona “Chinoz neftni qayta ishlash zavodi” savdo belgisi ostida faoliyat yuritadi.
Korxona 2016-yil 11-avgust kuni faoliyatini boshlagan. Ustav fondi – 102 mlrd so‘mni tashkil etadi.
Izoh (0)