O‘zbekistonda bulg‘or qalampiri narxi go‘sht narxiga tenglashgani haqida xabar berilgandi.

Nega narxlar oshib ketdi? Bu sotuvchi va xaridorlarga qanday ta’sir ko‘rsatmoqda? Bu haqda Qishloq xo‘jaligi vazirligi ma’lumot berdi.

Ma’lumotlarga ko‘ra, “Yunusobod” va “Eski Juva” dehqon bozorlarida sotuvchilar avvalgi yillarda bulg‘or qalampirining narxi bunchalik yuqori bo‘lmaganini va bu yilgi holat yanvar oyida respublikamizda kuzatilgan keskin sovuq bilan bog‘liqligini ta’kidlashmoqda.

Qishloq xo‘jaligida xizmatlar ko‘rsatish agentligidagi bo‘lim boshlig‘i Shavkat Azizovga ko‘ra, bugungi kunda mamlakatda 3 188 ta issiqxona xo‘jaliklari tomonidan jami 6 300 gektar maydonlarda sabzavot mahsulotlari yetishtirilmoqda. 

Joriy yilda issiqxona xo‘jaliklarida 500 gektarga yaqin yer maydonida shirin bulg‘or qalampirlari ekilgan.

Ayni kunlarda bozorlardagi ushbu mahsulot narxining ko‘tarilishiga yanvar oyida keskin sovuq bo‘lgani va o‘simlikning vegetatsiya davrida yetarli darajada issiqlik bilan ta’minlay olinmagani sababli stressga tushgani ko‘rsatilmoqda. Shuning natijasida yetishtirish davri 20-25 kunga kechikdi.

Hozirda mamlakatdagi issiqxonalarda aholining ehtiyojini qondirish, ichki bozorlarni ta’minlash uchun yetarli miqdorda bulg‘or qalampirlari yetishtirilmoqda. Aprel oyining ikkinchi yarmida bulg‘or qalampirining narxi barqarorlashishi kutilmoqda.

Ma’lumotlarga ko‘ra, issiqxonada 20 darajali issiqlik bo‘lsagina, bulg‘or qalampirlari o‘sishda davom etadi. Agar harorat bundan pasayib ketsa, bulg‘or qalampirlari stressga tushib, rivojlanishi sekinlashadi.