“Latsio” to‘purari Chiro Immobilening avtomobili tramvay bilan to‘qnashdi (video)

“Latsio” klubi va Italiya terma jamoasi hujumchisi Chiro Immobile Rimda YTH ishtirokchisiga aylandi. Bu haqda RainNews xabar qilmoqda.

Futbolchi o‘zining Land Rover Defender avtomobilida tramvay bilan to‘qnashib ketgan. Voqea vaqtida mashinada futbolchining ikki nafar qizi ham bo‘lgan. To‘qnashuv oqibatida tramvay relsdan chiqib ketgan, avtomobil esa pachaqlangan.

YTH oqibatida tramvayda bo‘lgan bir necha yo‘lovchi jarohat olgan va ular darhol shifoxonaga olib ketilgan. Immobile va uning qizlariga jiddiy shikast yetmagan. Futbolchi qo‘li biroz og‘riyotganini aytgan.

Politsiya bilan bo‘lgan suhbatda Chiro tramvay qizil chiroqda harakatlanganini aytgan. Shuningdek, voqeaga guvoh bo‘lgan bir necha kishi YTHga tramvay haydovchisi aybdor ekanini qayd etgan.

Immobile A Seriya joriy mavsumida 23 ta o‘yin o‘tkazib, 10 ta gol va 3 ta golli uzatma muallifiga aylandi.