“Лацио” тўпурари Чиро Иммобиленинг автомобили трамвай билан тўқнашди (видео)

“Лацио” клуби ва Италия терма жамоаси ҳужумчиси Чиро Иммобиле Римда ЙТҲ иштирокчисига айланди. Бу ҳақда RainNews хабар қилмоқда.

Футболчи ўзининг Land Rover Defender автомобилида трамвай билан тўқнашиб кетган. Воқеа вақтида машинада футболчининг икки нафар қизи ҳам бўлган. Тўқнашув оқибатида трамвай релсдан чиқиб кетган, автомобиль эса пачақланган.

ЙТҲ оқибатида трамвайда бўлган бир неча йўловчи жароҳат олган ва улар дарҳол шифохонага олиб кетилган. Иммобиле ва унинг қизларига жиддий шикаст етмаган. Футболчи қўли бироз оғриётганини айтган.

Полиция билан бўлган суҳбатда Чиро трамвай қизил чироқда ҳаракатланганини айтган. Шунингдек, воқеага гувоҳ бўлган бир неча киши ЙТҲга трамвай ҳайдовчиси айбдор эканини қайд этган.

Иммобиле А Серия жорий мавсумида 23 та ўйин ўтказиб, 10 та гол ва 3 та голли узатма муаллифига айланди.