Saudiya Arabistoni Ronaldu ortidan Messi va Yevropa top-ligalarida harakat qiladigan yana 50 ga yaqin futbolchini olib kelmoqchi

Krishtianu Ronaldu “Al-Nassr”ga o‘tganidan keyin Saudiya Arabistoni chempionatidagi klublar Yevropaning top ligalarida o‘ynayotgan 50 nafar futbolchi bilan shartnoma imzolashni xohlamoqda. Bu haqda ESPN xabar berdi.

Qayd etilishicha, yozda “PSJ” bilan shartnomasi yakuniga yetadigan Lionel Messi ham Ronalduning ortidan Saudiya Arabistoniga yo‘l olishi mumkin. Chempionat rahbarlari bu bilan to‘xtab qolmoqchi emas.

Liga yozda Portugaliya va top-5 ligalardan 50 nafargacha futbolchi bilan shartnoma imzolamoqchi, deya xabar bermoqda ESPN nashrining Saudiyadagi manbalari. Bu rejani Saudiya Arabistoni sport vazirligi ham qo‘llab-quvvatlagan. Asosiy maqsad yozda klublari bilan shartnomasi yakunlanadigan futbolchilar bo‘ladi. Jumladan, Roberto Firmino (“Liverpul”), Ilkay Gundo‘g‘an (“Manchester Siti”), Adama Traore (“Vulverhempton”), Yerri Mina va Abdulay Dukure (ikkisi ham “Everton”). Ma’lumotlarga ko‘ra, Yevropa klublari to‘qnash kelayotgan moliyaviy muammolar Saudiya jamoalari uchun yangi transfer imkoniyatlarini ochadi.

Saudiyaning deyarli barcha klublari tarkibida 8 nafardan legioner futbolchi bor. Bu chempionatda xorijlik futbolchilar uchun ruxsat berilgan maksimal kvota hisoblanadi. Biroq yozda legioner futbolchilarning sifatida sezilarli darajada o‘sish bo‘lishi kutilmoqda. Klublar tarkibda tozalash ishlarini olib boradi.

Agentlardan biri Saudiya klublari uchun Ispaniya, Marokash va Kolumbiya terma jamoalari futbolchilari bilan muzokara o‘tkazganini ma’lum qildi. Krishtianu Ronalduning katta maoshiga qaramay boshqa futbolchilarga bunday katta summalar taklif qilinmaydi. Bu holatda Ronaldu va Messi istisno hisoblanadi.

“Bu bir necha yil avvalgi Xitoy chempionatidek bo‘lmaydi. Katta pullar sarflash rejasi yo‘q. Saudiya Arabistoni tezlik bilan o‘zgarmoqda. Futbol esa ommaviy sport turi, uning muxlislari ko‘p. Bu Qatardagi Jahon Chempionatida ham ko‘rindi. Maqsad — Saudiya Arabistoni chempionatini mintaqadagi eng yaxshi ligaga aylantirish. Lekin bu dunyodagi eng yaxshi 50 futbolchi bilan shartnoma imzolashga harakat qilish degani emas. Liga sifatini va imijini ko‘tarishni xohlaymiz. Chempionatni Yevropa top ligalaridan tashqaridagi birinchi tanlov bo‘lishini xohlaymiz”, — dedi manba.

Avvalroq Lionel Messi Saudiya Arabistonining Jahon Chempionati mezbonligi uchun elchisiga aylanishi mumkinligi haqida xabar berilgandi.