“PSJ” bosh murabbiyi Kristof Galte katta muammolarga o‘ralashib qoldi. Fransiyalik mutaxassis irqchilikda ayblanmoqda. Hammasiga u “Nitssa”da (2021–2022-yillar) ishlagan vaqtda yozilgan elektron xat sabab bo‘lgan.
Galte Ramazon ro‘zasini tutgan futbolchilariga jahl qilgan
2022-yilning sentabr oyida Galte allaqachon “PSJ” murabbiyi sifatida ishlayotgandi. “Nitssa” sport direktori Julyen Furne esa g‘alati bayonot berdi.
Agar Galte bilan janjalning haqiqiy sababini aytsam, unga Yevropa klublaridagi kiyim almashtirish xonalarining birortasida joy bo‘lmaydi. Bu futboldan ham ko‘ra jiddiyroq narsa.
Galte esa “Uning xarakterini bilganim uchun bayonot uslubidan hayratga tushmadim”, deya uning gaplariga munosabat bildirishni istamagan.
Endilikda detallar ochiqlandi: Furne o‘z shikoyatini elektron xatga yozgan va Ineos (“Nitssa” egalari) kompaniyasiga yuborgan. Xatning matni RMC Sport jurnalisti Daniel Rioloning pochtasiga kelib qoldi. U bir hafta davomida xatning haqiqiyligini tekshirdi va e’lon qilishga qaror qildi. Ma’lumot uchun, xat Kristof Galte emas, balki “Nitssa” sport direktori Julyen Furne tomonidan yuborilgan.
Xatning eng e’tiborga molik qismi — Furnening Galtening o‘g‘li bilan uchrashuvi:
“U menga otasining yomon holatda ekanini quyidagi so‘zlar bilan izohladi: ‘Julyen, holat yaxshi emas, otam kecha yig‘ladi, sen tushunmayapsan’. Undan nima bo‘layotganini so‘radim. U esa bu jamoa otasiga to‘g‘ri kelmasligini, bunday davom etishi mumkin emasligini aytdi. Yaxshiroq tushunishim uchun undan aniqlik kiritishini so‘radim. U esa menga ‘sen axlat jamoani tuzgansan’, dedi. Men yana aniqroq gapirishini so‘radim. ‘Klubda faqat qora tanlilar, jamoangni yarmi esa juma kuni kunduzi machitda...’, deb javob berdi. Men Jon Valovich-Galtega so‘zlaridan g‘azablanganimni va kabinetimni tezda tark etishini aytdim’.
Murabbiyning o‘zi bilan bo‘lgan dialog haqida.
“Kristofdan o‘g‘lining gaplari rostmi deya so‘radim. U ha, deb javob berdi. Menga ‘shahar haqiqatlari’ni hisobga olishim kerakligi, jamoada haqiqatan ham bunchalik ko‘p qora tanli va musulmon futbolchilar bo‘lishi kerakmasligini aytdi.
Galte menga shunday dedi: ‘Kecha kechqurun restoranga borgandim. Hamma menga jamoada qora tanlilar ko‘payib ketganini aytib, tashlandi. Julyen sen qaysi shaharda ekanimizni tushunishing kerak. Bu Jak Medesenning (Nitssa shahrining sobiq meri) shahri. Bizning jamoa odamlar xohishiga mos kelmaydi, shuningdek, mening xohishimga ham’.
O‘rtamizda sport masalalari borasida tortishuv bo‘lmagan. Faqat futbolchilarning dini yoki terisining rangi bo‘yicha tortishuvlar bo‘lgan”, — deb yozgan Furne “Nitssa” rahbariyatiga.
Galte Ramazon borasida ham shikoyat qilgan. Hatto 23 yoshli yarim himoyachi Bilol Braimini tarkibdan chetlashtirgan. U ro‘za tutgani uchun “Renn”ga qarshi o‘yinni o‘tkazib yuborgan. Murabbiy ochlik futbolchilarning sport formasiga yomon ta’sir qiladi, deb hisoblagan. Get French Football News ma’lumotlariga ko‘ra, Galte o‘yinchilarning fitnes-ma’lumotlarini guruhlarga ajratgan, biroq Ramazonda futbolchilarning natijalari yomonlashmagani ma’lum bo‘lgan.
Shunga qaramay Galte “Nitssa” futbolchilaridan Ramazon oyi ro‘zasini tutmaslikni so‘ragan. Jamoadagi musulmon o‘yinchilar bunga har xil munosabat bildirgan. Masalan, jazoirlik yarim himoyachi Xisham Budavi rozi bo‘lgan, Jan-Kler Todiboning esa jahli chiqqan va hatto mashg‘ulot konusini ham uloqtirgan.
Furne xat feyk ekanini aytmadi. Galte aybni bo‘yniga olmayapti va haqorat, tuhmat uchun sudga berishga tayyorlanmoqda
Julyen Furne xabar tarqatilgan vaqtda g‘azablandi, biroq xat haqida hech narsa demadi.
“Hozirgi vaqtda men Braziliyada, o‘zim aralashib qolgan bahs-munozaralardan ancha uzoqdaman. Klubni tark etganim uchun, bir yil avvalgi ichki ma’lumotlarning tarqalishi bo‘yicha hech qanday javobgarlikni o‘z bo‘ynimga olmayman, — dedi Furne.
Galtening advokati Olivye Martenning so‘zlariga ko‘ra mutaxassis “qat’iyatli so‘zlar bilan” ayblovlarni rad etgan. RMC Sport xabar berishicha, Kristof “haqoratli va tuhmatli so‘zlar uchun” sudga murojaat qilishga ham tayyor. “PSJ” bundan xabardor qilingan.
“Lill”dagi faoliyati davomida Galte bilan birga ishlagan hujumchi Burak Yilmaz sobiq murabbiyini himoya qilmoqda: “Men Galte bilan ishlaganman va hech qachon dinimga yoki millatimga qilingan yomon muomalasini ko‘rmaganman. U yaxshi murabbiy. Shuningdek, ajoyib inson”.
Murabbiyga o‘lim bilan tahdid qilindi. “PSJ” Galtega qo‘riqchi berdi va hozircha uni ayblashga shoshilmayapti
Galte oxirgi sutkalarda minglab qo‘ng‘iroq va xabarlar olgan. Ularning ba’zilarida murabbiyga o‘lim bilan tahdid qilingan. “PSJ” murabbiy va uning oilasini himoya bilan ta’minladi, deb xabar qilmoqda RMC Sport.
“PSJ” ichki surishtiruvni boshladi. Klub xulosa chiqarishga yoki vahima qilishga shoshilmayapti. Chunki ular bir-birini rad etuvchi versiyalar bo‘lishini tushunadi.
Parijliklar murabbiyga asossiz ayblovlarni qo‘ymoqchi emas. Shuningdek, Galte ishga qabul qilingan vaqtda Nossir al-Helayfi bu kabi ehtimoliy bayonotlardan xabardor bo‘lmagan. Aks holda Galte hech qachon jamoa murabbiyi etib tayinlanmagan bo‘lardi.
Agar Galtening so‘zlari haqidagi ma’lumot tasdiqlansa, “PSJ” katta ehtimol bilan uni iste’foga chiqaradi. Parij klubi murabbiyga juma kuni rejalashtirilgan matbuot anjumanigacha voqea bo‘yicha o‘z versiyasini aytib berishiga imkon bermoqchi.
Izoh (0)