“Bavariya” Sadio Maneni katta miqdorda jarimaga tortdi. Leroy Sane klubdan jamoadoshiga keskin jazo bermaslikni so‘ragan

“Bavariya” rahbariyati hujumchi Sadio Maneni jarimaga tortdi. Bu haqda klub matbuot xizmati ma’lum qildi.

Shuningdek, klub bayonotida qayd etilishicha, futbolchi Bundesliga doirasidagi “Hoffenhaym”ga qarshi bahsni o‘tkazib yuboradi.

Xabarlarga ko‘ra, Myunxen klubi Senegal terma jamoasi hujumchisini 500 ming yevro miqdorida jarimaga tortgan.

Bild nashrining xabar qilishicha, Futbolchilar o‘zaro kelishib olgan. Leroy Sane klubdan Mane bilan shartnomani bekor qilmaslikni va uni keskin jazolamaslikni so‘ragan.

Chempionlar Ligasi chorak final dastlabki o‘yini doirasida “Manchester Siti”ga qarshi o‘yindan (0:3) keyin Mane kiyinish xonasida Sanening yuziga zarba bergan va jamoadoshining labiga jarohat yetkazgandi.

Qator OAV “Bavariya” Manening bu harakatiga nisbatan keskin jazo qo‘llashi, ular orasida futbolchi bilan shartnomani bekor qilish varianti ham borligi xabar qilingandi.