Саудия Арабистони Роналду ортидан Месси ва Европа топ-лигаларида ҳаракат қиладиган яна 50 га яқин футболчини олиб келмоқчи

Криштиану Роналду “Ал-Насср”га ўтганидан кейин Саудия Арабистони чемпионатидаги клублар Европанинг топ лигаларида ўйнаётган 50 нафар футболчи билан шартнома имзолашни хоҳламоқда. Бу ҳақда ESPN хабар берди.

Қайд этилишича, ёзда “ПСЖ” билан шартномаси якунига етадиган Лионель Месси ҳам Роналдунинг ортидан Саудия Арабистонига йўл олиши мумкин. Чемпионат раҳбарлари бу билан тўхтаб қолмоқчи эмас.

Лига ёзда Португалия ва топ-5 лигалардан 50 нафаргача футболчи билан шартнома имзоламоқчи, дея хабар бермоқда ESPN нашрининг Саудиядаги манбалари. Бу режани Саудия Арабистони спорт вазирлиги ҳам қўллаб-қувватлаган. Асосий мақсад ёзда клублари билан шартномаси якунланадиган футболчилар бўлади. Жумладан, Роберто Фирмино (“Ливерпуль”), Илкай Гундўған (“Манчестер Сити”), Адама Траоре (“Вулверҳэмптон”), Ерри Мина ва Абдулай Дукуре (иккиси ҳам “Эвертон”). Маълумотларга кўра, Европа клублари тўқнаш келаётган молиявий муаммолар Саудия жамоалари учун янги трансфер имкониятларини очади.

Саудиянинг деярли барча клублари таркибида 8 нафардан легионер футболчи бор. Бу чемпионатда хорижлик футболчилар учун рухсат берилган максимал квота ҳисобланади. Бироқ ёзда легионер футболчиларнинг сифатида сезиларли даражада ўсиш бўлиши кутилмоқда. Клублар таркибда тозалаш ишларини олиб боради.

Агентлардан бири Саудия клублари учун Испания, Марокаш ва Колумбия терма жамоалари футболчилари билан музокара ўтказганини маълум қилди. Криштиану Роналдунинг катта маошига қарамай бошқа футболчиларга бундай катта суммалар таклиф қилинмайди. Бу ҳолатда Роналду ва Месси истисно ҳисобланади.

“Бу бир неча йил аввалги Хитой чемпионатидек бўлмайди. Катта пуллар сарфлаш режаси йўқ. Саудия Арабистони тезлик билан ўзгармоқда. Футбол эса оммавий спорт тури, унинг мухлислари кўп. Бу Қатардаги Жаҳон Чемпионатида ҳам кўринди. Мақсад — Саудия Арабистони чемпионатини минтақадаги энг яхши лигага айлантириш. Лекин бу дунёдаги энг яхши 50 футболчи билан шартнома имзолашга ҳаракат қилиш дегани эмас. Лига сифатини ва имижини кўтаришни хоҳлаймиз. Чемпионатни Европа топ лигаларидан ташқаридаги биринчи танлов бўлишини хоҳлаймиз”, — деди манба.

Аввалроқ Лионель Месси Саудия Арабистонининг Жаҳон Чемпионати мезбонлиги учун элчисига айланиши мумкинлиги ҳақида хабар берилганди.