Chempionlar Ligasi chorak finali doirasida “Manchester Siti”ga qarshi kechgan o‘yindan keyin “Bavariya” futbolchilari Sadio Mane va Leroy Sane o‘rtasida kelishmovchilik yuzaga kelgan.
Kiyinish xonasida senegallik futbolchi jamoadoshining yuziga zarba bergan. Oqibatda Leroyning labi yorilgan. Shundan keyin “Bavariya”ning boshqa futbolchilari darhol ularni ajratgan. Kiyinish xonasidan Saneni olib chiqib ketishgan.
Futbolchilar o‘rtasidagi kelishmovchilik maydondayoq boshlangandi. 83-daqiqada futbolchilar tortishayotgani aks etgan epizod translyatsiyada ko‘ringan. Bu keskinlik o‘yindan keyin yana-da avj olgan. Taxminlarga ko‘ra, Sadioga jamoadoshining qo‘pol gaplari yoqmagan.
Sky Sport Deutschland jurnalisti Florian Plettenbergga ko‘ra, “Bavariya” Manening bu qilig‘ini jazosiz qoldirmoqchi emas, bu ish faqat jarima bilan tugamasligi katta ehtimol. Shuningdek, bu holat “Bavariya”ning boshqa futbolchilarini hayratda qoldirgan. Ko‘pchilik bu voqeadan keyin Manening klubda qolishiga ishonmayapti.
“Joriy mavsumdan keyin Mane Myunxenda qoladi deb o‘ylamayman”, — deydi jurnalist.
Hozircha “Bavariya” bunga rasmiy munosabat bildirmadi. Ayni vaqtda klubda senegallik futbolchining harakatlari yuzasidan surishtiruv ketyapti va tez orada uning qilmishiga baho beriladi. Mane jarimaga tortilishi yoki mashg‘ulotlardan chetlatilishi mumkin. Shuningdek, futbolchi bilan shartnomani bekor qilishlari ham mumkin.
Avvalroq “Bavariya” sobiq bosh murabbiyi Yulian Nagelsmann jamoa darvozaboni Manuel Noyer bilan kelishmovchilikka borgandi. Nagelsmanning talabi bilan “Bavariya” darvozabonlar murabbiyi Toni Tapalovich vazifasidan ozod etilgan va Noyer bu vaziyat borasidagi noroziligini OAV orqali keskin bildirgandi.
Izoh (0)