IBA’ga qarshi kurash davom etadi. AQSH va Buyuk Britaniya alohida boks tashkiloti tashkil qilmoqchi

Xalqaro boks assotsiatsiyasining (IBA) g‘arb mamlakatlari bilan munosabatlari tobora keskinlashib boryapti.

AQSH va Buyuk Britaniya IBA tarkibidan chiqib, alohida tashkilot yaratishni reja qilmoqda, deya xabar qilmoqda Inside the Games.

AQSH va Buyuk Britaniyaning boykotiga bir nechta Yevropa mamlakatlari qo‘shilishga tayyor. Ular World Boxing tashkilotiga asos solmoqchi. Tomonlar 13-aprel kuni ushbu masala bo‘yicha onlayn brifing o‘tkazadi.

IBA esa Xalqaro Olimpiya qo‘mitasiga (XOQ) ariza yuborgan va Parij—2024 Olimpiadasi uchun yo‘llanma berishi kutilayotgan Yevropa o‘yinlarini litsenzion musobaqa maqomidan mahrum etishni so‘ragan.

IBA Rossiya va Belarus bokschilari Yevropa o‘yinlari musobaqasidan chetlatilganini bunga sabab sifatida ko‘rsatgan.

Yevropa o‘yinlari 21-iyundan 2-iyulga qadar Polshada bo‘lib o‘tadi. Undagi boks musobaqasida Parij—2024 Olimpiya o‘yinlariga yo‘llanmalar o‘ynaladi.

Avvalroq AQSH, Shvetsiya, Irlandiya, Chexiya va Kanada boks federatsiyalari Hindiston (ayollar o‘rtasida) va O‘zbekistonda (erkaklar o‘rtasida) bo‘lib o‘tadigan boks bo‘yicha Jahon сhempionatiga boykot e’lon qilgani xabar qilingandi. Keyinchalik Ukraina va Norvegiya ham ularga qo‘shilgan. Bunga sabab sifatida federatsiyalar Rossiya va Belarus bokschilariga musobaqalarda o‘z bayrog‘i ostida harakat qilishga ruxsat berilganini qayd etgandi.

Eslatib o‘tamiz, rossiyalik Umar Kremlyov 2020-yilning dekabridan buyon IBA’ni boshqarib kelmoqda. Bungacha u Rossiya boks federatsiyasi bosh kotibi lavozimida ishlagan. U lavozimga tayinlangan paytda IBA’ning qarzlari 20 million dollarni tashkil qilgan. 2021-yilning may oyida Kreml barcha qarzlarning to‘liq qaytarilishini e’lon qilgan. 2022-yilda Kremlyov IBA prezidentligiga qayta saylandi.