Toshkent viloyati Ohangaron tumanida 8 gektarli g‘isht zavodini auksiondan arzon narxlarda olib berishni vaʼda qilgan shaxslar qo‘lga olindi. Bu haqda Bosh prokuratura huzuridagi departament xabar berdi.
Qayd etilishicha, departamentning Toshkent viloyat boshqarmasi tomonidan IIV korrupsiyaga qarshi kurashish boshqarmasi xodimlari bilan hamkorlikda tezkor tadbir o‘tkazilgan. Tadbirda muqaddam firibgarlik jinoyati uchun sudlangan N.P va S.N. Ohangaron tumanida 8 gektar yer maydonida joylashgan g‘isht ishlab chiqarish zavodini fuqaro F.Sh.ga tanishlari yordamida 200 ming dollar evaziga auksion orqali arzon narxlarda yutib olib berishni vaʼda qilgani aniqlangan. Ular oldindan 20 ming dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Navoiyda 100 mln so‘m evaziga fuqaroning tergov ishini yengillatib berishni va’da qilgan ayol qo‘lga olingani, Buxoroda hokimlik zaxirasidagi 10 sotix yerni sotishga uringan shaxs ushlangani to‘g‘risida xabar berilgandi.
Izoh (0)