Xabaringiz bor, kecha, 7-aprel kuni Open budget’ga ovoz yig‘ish yakunlanib, joriy yil birinchi mavsum g‘oliblari eʼlon qilindi. Eng ko‘p ovoz to‘plagan mahallalar vakillari bayram qilishni boshlab yubordi. G‘olib mahallalarda karnay-surnay sadolari yangramoqda.
Maʼlum bo‘lishicha, birinchi mavsumda g‘olib deb topilgan tashabbuslar 1666 ta bo‘lib, bu ishlar uchun 1,6 trillion so‘m mablag‘ ajratilgan.
Qashqadaryo viloyatining Dehqonobod tumanidagi “Oqrabot” mahalla fuqarolar yig‘inida joylashgan 7-sonli umumtaʼlim maktabining asosiy binosidan Shamolikam qishlog‘idagi maktab filialiga borish uchun 3,5 kilometr yo‘l bosiladi. Mazkur yo‘l ahvoli achinarli bo‘lgani bois, mahalliy aholi ushbu yo‘lni asfaltlash uchun 1 milliard 200 million so‘m miqdorda mablag‘ so‘rab, yo‘l taʼmirini taklif qilgan. Tasdiqlangan mablag‘ 900 million so‘mni tashkil qilmoqda. “Tashabbusli budjet”da faol bo‘lgan mahalla mazkur loyihasini amalga oshirish uchun yetarli ovoz to‘pladi va 900 million so‘m miqdoridagi mablag‘ni qo‘lga kiritdi. Mahalla aholisi bayramni boshlab yuborgan.
Shuningdek, Yakkabog‘ tumanidagi “Darxon” MFY Butasoy qishlog‘i, Yangiobod qishlog‘i aholisi 25 mingga yaqin ovoz to‘plab, kerakli mablag‘ni qo‘lga kiritdi.
“Tashabbusli budjet”da ovoz bergan fuqarolar O‘zbekistondagi mavjud aholining 45 foizini tashkil qilmoqda. Maʼlum bo‘lishicha, joriy mavsumda 16 milliondan ortiq ovozlar berilgan. 7,7 milliondan ortiq ovozlar loyihalarning g‘olib bo‘lishiga sabab bo‘lgan. Ovoz berish jarayonlarida esa jami 8826 ta mahalla ishtirok etgan.
Misol uchun, Surxondaryo viloyatida — 719 ta (jami mahalla soniga nisbatan 99 foiz), Qashqadaryo viloyatida — 813 ta (99 foiz) va Namangan viloyatida — 779 ta (98 foiz) mahallalar ovoz berish jarayonlarida ishtirok etdi.
Izoh (1)
Опен бюджет шарманда