Oliy taʼlim, fan va innovatsiyalar vaziri Ibrohim Abdurahmonov Xitoy Fanlar akademiyasi huzuridagi Sinszyan ekologiya va geografiya institutining bir guruh olimlarini qabul qildi.
Uchrashuv doirasida Prezident huzuridagi Orolbo‘yi xalqaro innovatsiya markazi va Sinszyan ekologiya va geografiya instituti hamkorligida 2023–2025-yillarda amalga oshiriladigan qiymati 500 ming dollar bo‘lgan “Orol dengizi havzasining ekologik tiklanishida fotoelektr quyosh energiyasidan foydalanish tajribasini qo‘llash va namoyish etish” innovatsion loyihasini amalga oshirish istiqbollari muhokama qilingan.
Loyiha doirasida quyosh panellari ostida galofit, cho‘l va sho‘rga chidamli o‘simliklarni o‘stirish, quyosh panellari orqali olingan elektr energiyadan, jumladan, sho‘rlangan suvlarni tozalovchi maxsus texnologiyalarni qo‘llashda foydalanilishi nazarda tutilgan. Shu yo‘sinda cho‘llangan hududda hosil bo‘ladigan yashil qoplamalar qum bo‘ronlarining hosil bo‘lishini oldini olishga xizmat qiladi.
Ibrohim Abdurahmonov mazkur loyiha hamda Sinszyan ekologiya va geografiya institutining O‘zbekiston ilmiy-tadqiqot muassasalari bilan hamkorligi doirasidagi loyihalarni qo‘llab-quvvatlashga tayyorligini bildirgan. Suhbat davomida, shuningdek, koronavirus pandemiyasidan keyingi davrda mamlakatlar o‘rtasidagi ikki tomonlama ilmiy-texnikaviy hamkorlikni faollashtirish bo‘yicha ham fikr almashilgan.
Shu bilan birga, Sirdaryo viloyatida ekologiya, qishloq xo‘jaligi, suv muammolari, irrigatsiya yo‘nalishlari bo‘yicha O‘zbekiston—Xitoy qo‘shma oliy taʼlim va ilmiy-tadqiqot muassasalarini tashkil etish bo‘yicha dastlabki kelishuvga erishilgan.
Uchrashuv yakunida Xitoy tomoni vazir Ibrohib Abdurahmonovni 2023-yil avgust oyida Urumchi shahrida bo‘lib o‘tadigan xalqaro forumda ishtirok etish uchun taklif etgan.
Avvalroq Alpha Gakuin instituti va Surxondaryo viloyati hokimligi o‘rtasida Termiz shahrida O‘zbekiston—Yaponiya texnologik universitetini tashkil etish bo‘yicha hamkorlik memorandumi imzolangani to‘g‘risida xabar berilgandi.
Izoh (0)