Oliy Majlis Senati Kengashining navbatdagi majlisi bo‘lib o‘tdi. Uni Senat Raisi Tanzila Norboyeva olib bordi, deb xabar beradi parlament yuqori palatasi matbuot xizmati.
Majlisda Senatning o‘ttiz to‘qqizinchi yalpi majlisini 6-aprel kuni chaqirish to‘g‘risida qaror qabul qilingan. Qayd etilishicha, videokonferensaloqa tizimidan foydalangan holda o‘tkaziladigan mazkur yalpi majlisda bir qator qonun va masalalarni muhokama qilish rejalashtirilgan.
“Davlat hisobidan yuridik yordam ko‘rsatish to‘g‘risida”gi, “O‘zbekiston Respublikasining Maʼmuriy javobgarlik to‘g‘risidagi kodeksiga O‘zbekiston Respublikasining Davlat chegarasini qo‘riqlash va himoya qilishni yanada kuchaytirishga qaratilgan qo‘shimcha va o‘zgartishlar kiritish haqida”gi, “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimining yanada takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunlar shular jumlasidandir.
Shuningdek, “O‘zbekiston Respublikasining Jinoyat kodeksiga korrupsiyaga oid jinoyatlar uchun javobgarlik muqarrarligini taʼminlashga qaratilgan o‘zgartish va qo‘shimchalar kiritish to‘g‘risida”gi, “O‘zbekiston Respublikasi bilan Qozog‘iston Respublikasi o‘rtasida ozodlikdan mahrum etilgan shaxslarni jazoni o‘tashni davom ettirish uchun topshirish to‘g‘risidagi shartnomani (Nur-Sulton, 2021-yil 6-dekabr) ratifikatsiya qilish haqida”gi, “O‘zbekiston Respublikasi hukumati bilan Ozarbayjon Respublikasi hukumati o‘rtasida harbiy sohada hamkorlik to‘g‘risidagi bitimni (Toshkent, 2022-yil 21-iyun) ratifikatsiya qilish haqida”gi hamda “O‘zbekiston Respublikasi hukumati bilan Ozarbayjon Respublikasi hukumati o‘rtasida harbiy-texnikaviy hamkorlik to‘g‘risidagi Bitimni (Toshkent, 2022-yil 21-iyun) ratifikatsiya qilish haqida”gi qonunlar muhokama qilinadi.
Shu bilan birga, senatorlar Oliy Majlis Inson huquqlari bo‘yicha vakilining (ombudsmanning) 2022-yildagi faoliyati to‘g‘risidagi hisobotini, Tashqi ishlar vazirligining 2022-yildagi faoliyati to‘g‘risidagi axborotini eshitadi.
Bundan tashqari, yalpi majlis kun tartibi doirasida muzey ashyolari va kolleksiyalarini saqlash hamda ularning xavfsizligini taʼminlash choralari yuzasidan Madaniy meros agentligiga parlament so‘rovi yuborish, Senatning Orolbo‘yi mintaqasida ekologik barqarorlikni taʼminlash hamda zamonaviy innovatsion texnologiyalarni keng tatbiq qilish bo‘yicha belgilangan vazifalar ijro etilishi yuzasidan 2022-yil 7-oktabrda qabul qilingan SQ-638–IV-sonli qarori bajarilishi masalalarini ham ko‘rib chiqish nazarda tutilgan.
Yalpi majlisda Oliy Majlis Senati Kengashining qarorlarini ham tasdiqlash rejalashtirilgan.
Izoh (0)