Ўзбекистонда энг фаол банклар рейтинги янгиланди

Иқтисодий тадқиқотлар ва ислоҳотлар маркази томонидан 2023 йил биринчи чорак учун “Банклар фаоллик индекси” ҳисобланди ва ушбу индексга асосан банкларнинг рейтинги янгиланди. Бу ҳақда Марказ матбуот хизмати “Дарё”га маълум қилди. 

Мазкур индекс мамлакатдаги 29 та банклар учун, банкларнинг ҳажмига қараб катта (17 та) ва кичик (12 та) банкларга гуруҳланган ҳолда ҳисобланган.

Йирик банклар рейтингида “Kapitalbank” етакчиликни сақлаб қолган бўлса, “Азия Алянс” банк 1 поғонага кўтарилиб, рейтингнинг 3-поғонасига тушган “Ҳамкорбанк” билан ўрин алмашди.

“Trast bank” кетма-кет учинчи чорак учун рейтингда ўз мавқеини йўқотмоқда. Ушбу банк яна 1 поғонага пастлади ва 5-ўринни эгаллаб, “Ипак йўли банк”ка ўз ўрнини бўшатиб берди. 

Шу билан бирга, “Ипотека банк” ва “Миллий банк” 2 поғонага, “Халқ банк”, “Ориент Финанс банк” ва “Асака Банк” 1 поғонага кўтарилган бўлса, “Инвест Финанс банк” ва “Агробанк” бир йўла 3 поғонага, “Турон Банк” 1 поғонага пастлаган, қолган банклар ўз ўринларини сақлаб қолишган.

Давлат улуши мавжуд йирик банклардан фақат “Агробанк” ва “Турон банк” пастлади ва мутаносиб равишда 14-ўринни ҳамда 17-ўринни эгаллади. 

Шу билан бирга “Агробанк” мазкур чоракда фақат капитал етарлилик ва ликвидлилик кўрсаткичи бўйича пастлаган бўлса, “Турон банк” даромад олиш салоҳияти кўрсаткичи сезиларли пасайган.

Давлат улуши мавжуд йирик банклардан “Ипотека банк” 2 поғонага кўтарилиб, 7-ўринни эгаллади. Банк мазкур чоракда активлари сифати кўрсаткичи бўйича пастлаган бўлса, капитал етарлилиги, ликвидлилик ҳамда бошқарув самарадорлиги кўрсаткичлари ўсган. Бироқ Молия вазирлигидан олинган депозитлар ва кредитлар миқдорини ўз мажбуриятларига нисбати юқорилигича қолмоқда.

Кичик банклар рейтингида “Давр банк”, “Универсал банк” ва “Ziraat bank” етакчи ўринларни сақлаб қолган бўлса, “TBC bank” 2 поғонага кўтарилиб 4-ўринни эгаллаган. 

TBC bank капитал етарлилиги бўйича кўрсаткичи сезиларли пасайган бўлса-да, даромад олиш салоҳияти ҳамда бошқарув самарадорлиги кўрсаткичларининг яхшиланиши рейтингдаги ўрни кўтарилишига сабаб бўлди. 

Tenge bank, Аnor bank, “Пойтахт банк” ва “Ўзагроэкспорт банк” 1 поғонага пасайди. Шу билан бир вақтда, Мadad invest bank ва “Гарант банк” 1 поғонадан кўтарилди.

“Равнақ банк” ва “ЎзКДБ” ўтган даврга нисбатан ўз мавқеларини сақлаб қолди.