Qashqadaryo viloyatining Ko‘kdala tumanidagi “Beglamishsoy” mahallasida “Tashabbusimiz, iqtidorimiz, kuch-qudratimiz — Vatan uchun” shiori ostida ko‘pkari milliy sport turi bo‘yicha Qarshi davlat universiteti kubogi o‘tkazildi. Bu haqda “Daryo”ga universitet axborot xizmati rahbari Oybek Yusupov xabar berdi.
Maʼlum bo‘lishicha, kubok talabalarning dars mashg‘ulotlaridan bo‘sh vaqtini mazmunli o‘tkazish maqsadida tashkil etilgan bo‘lib, musobaqada keng jamoatchilik, qo‘shni viloyatlardan mehmonlar, minglab ko‘pkari ishqibozlari, universitet jamoasi, talaba-yoshlar, mohir chavandozlar hamda OAV xodimlari ishtirok etgan.
“Bayramona sport musobaqasi ‘Konstitutsiya meniki, seniki, bizniki. Konstitutsiya o‘zimizniki‘ shiori ostidagi targ‘ibot tadbiri bilan boshlandi. O‘zbekiston Qahramoni Muhabbat Sharopova, universitet professori Murodulla Normurodov, O‘zbekiston sanʼat arbobi, ‘Baron’ filmidagi baron roli bilan yaxshi tanilgan Isoq To‘rayev va boshqalar yangilanayotgan Konstitutsiyamizga kiritilayotgan o‘zgartirish va qo‘shimchalar haqida batafsil maʼlumot berib, barchani referendumda faol ishtirok etishga chaqirdi”, — deydi Oybek Yusupov.
Aytilishicha, musobaqa davomida tashkil etilgan konsertda O‘zbekistonda xizmat ko‘rsatgan artist Oygul Xalilova, “Shuhrat” medali sohibi Umrzoq Quvvatov, xonanda O‘ktam Aliyev, O‘ktam Avliyoqulov va “Dunyo” guruhi ishtirok etgan.
“Ko‘kdala kengliklarida barcha orziqib kutgan uloq-ko‘pkari musobaqasida nafaqat viloyatimizdan mohir chavandozlar, balki qo‘shni viloyatlardan ham ko‘plab chavandozlar qatnashdi. Dastlab universitet talabalaridan iborat ‘Universitet-1’ va ‘Universitet-2’ jamoalari o‘rtasida musobaqa tashkil etilib, unda ‘Universitet-1’ jamoasi 5:2 hisobida g‘alaba qozondi. G‘olib jamoaga ‘Qarshi davlat universiteti kubogi’ va qimmatbaho sovg‘alar topshirildi”, — deydi Oybek Yusupov.
Uloq-ko‘pkari musobaqasida bosh sovrin — tuyaga mohir chavandoz Shuhrat Soliyev egalik qilgan bo‘lsa, keyingi sovrin chopqir otga universitet talabasi Shahzod Toshmurodov ega chiqqan.
Izoh (0)