Қашқадарё вилоятининг Кўкдала туманидаги “Бегламишсой” маҳалласида “Ташаббусимиз, иқтидоримиз, куч-қудратимиз — Ватан учун” шиори остида кўпкари миллий спорт тури бўйича Қарши давлат университети кубоги ўтказилди. Бу ҳақда “Дарё”га университет ахборот хизмати раҳбари Ойбек Юсупов хабар берди.
Маълум бўлишича, кубок талабаларнинг дарс машғулотларидан бўш вақтини мазмунли ўтказиш мақсадида ташкил этилган бўлиб, мусобақада кенг жамоатчилик, қўшни вилоятлардан меҳмонлар, минглаб кўпкари ишқибозлари, университет жамоаси, талаба-ёшлар, моҳир чавандозлар ҳамда ОАВ ходимлари иштирок этган.
“Байрамона спорт мусобақаси ‘Конституция меники, сеники, бизники. Конституция ўзимизники’ шиори остидаги тарғибот тадбири билан бошланди. Ўзбекистон Қаҳрамони Муҳаббат Шаропова, университет профессори Муродулла Нормуродов, Ўзбекистон санъат арбоби, ‘Барон’ фильмидаги барон роли билан яхши танилган Исоқ Тўраев ва бошқалар янгиланаётган Конституциямизга киритилаётган ўзгартириш ва қўшимчалар ҳақида батафсил маълумот бериб, барчани референдумда фаол иштирок этишга чақирди”, — дейди Ойбек Юсупов.
Айтилишича, мусобақа давомида ташкил этилган концертда Ўзбекистонда хизмат кўрсатган артист Ойгул Халилова, “Шуҳрат” медали соҳиби Умрзоқ Қувватов, хонанда Ўктам Алиев, Ўктам Авлиёқулов ва “Дунё” гуруҳи иштирок этган.
“Кўкдала кенгликларида барча орзиқиб кутган улоқ-кўпкари мусобақасида нафақат вилоятимиздан моҳир чавандозлар, балки қўшни вилоятлардан ҳам кўплаб чавандозлар қатнашди. Дастлаб университет талабаларидан иборат ‘Университет-1’ ва ‘Университет-2’ жамоалари ўртасида мусобақа ташкил этилиб, унда ‘Университет-1’ жамоаси 5:2 ҳисобида ғалаба қозонди. Ғолиб жамоага ‘Қарши давлат университети кубоги’ ва қимматбаҳо совғалар топширилди”, — дейди Ойбек Юсупов.
Улоқ-кўпкари мусобақасида бош соврин — туяга моҳир чавандоз Шуҳрат Солиев эгалик қилган бўлса, кейинги соврин чопқир отга университет талабаси Шаҳзод Тошмуродов эга чиққан.
Изоҳ (0)