Hayot past-balandliklar, quvonchli va g‘amgin kunlardan iborat. Mashhur insonlarning hayoti ham bundan mustasno emas. “Sevimli” telekanalining “Mashhurlar” loyihasida bir guruh ayol san’atkorlar ishtirok etib, o‘zlari uchragan avtohalokatlar haqida so‘zlab berdi.
Malika Ravshanova: “Avariyadan keyin 8 yil rulga o‘tirolmaganman”
— 2008-yil Jizzaxga to‘yga ketayotganimizda, jiddiy yo‘l-transport hodisasiga uchraganmiz. Ya’ni yo‘ldan eshak chiqib qolgan. Biz ketayotgan mashina haydovchisi uni urib yubormaslik uchun mashinani chetga olgan. Baxtga qarshi mashina beton to‘siqqa borib urilgan. O‘shanda mashinaning yarmi yo‘q bo‘lib ketgandi. Undan keyingi voqealarni eslolmayman. Ko‘zimni ochganimda Toshkentga olib kelishganini aytishgandi. Bir yarim oy davomida o‘rnimdan turmay davolanganman. Chunki umurtqam jiddiy shikastlangan edi. Shu voqeadan keyin 8 yil rulga o‘tirishga qo‘rqqanman. Turmush o‘rtog‘im xorij safarlarida ko‘p bo‘lgani uchun mashina haydashga majbur bo‘lganman. Agar shu majburiyat bo‘lmaganida, rulga o‘tirish fobiyamga aylanib qolgan bo‘lardi, — deydi Malika Ravshanova.
Nargiz Yandasheva: “Yo‘ldagi harakat faqat sizga bog‘liq emas”
— Yaqinda juda qo‘rqinchli vaziyatga tushdim. O‘g‘lim va jiyanim bilan mashinada ketayotsak, katta yuk mashinasi yo‘ldan chiqib, mashinamni qisib qo‘ydi. Qo‘rqib ketdim, o‘zimdan avval o‘g‘lim va jiyanim haqida o‘yladim.
Tartibli haydovchiman, mashinani e’tibor bilan boshqarishga harakat qilaman. Ammo rulda faqat men emas, atrofdagilar ham e’tiborli bo‘lishi kerakligini angladim, — deydi xonanda.
Ra’no Yarasheva: “Oyoqlarim sinib, yuzlarim ko‘karib ketgan”
— 2006-yili uyimizni ta’mirlayotgandik, pul yetmay mashinamni sotishga to‘g‘ri keldi. Mashinasiz qiynalganimdan keyin Matiz rusumidagi arzonroq mashinani kreditga oldim. Nexiya’da yurishga o‘rganib qolgan ekanmanmi, bir kuni Matiz kichik do‘ngalakdan o‘tolmay boshim tomga urilgandi. Jahlim chiqib o‘z-o‘zimga “Matiz yaxshi mashina emas ekan”, degandim. Oradan hech qancha vaqt o‘tmay avtohalokatga uchraganman. Eng qizig‘i, o‘sha paytda “Sevinch” filmidagi qahramonimni mashina urib yuborgach, oyog‘i sinib, yuzlari ko‘karib ketgan holatda ko‘rsatgan edik. Haqiqiy avtohalokatdan so‘ng ikki oyog‘im sinib, yuzimning bir tomoni ko‘karib ketgandi. Mana shu voqeadan keyin mashina temir bo‘lsa-da gapni tushunishini anglaganman. Shuning uchun mashinalarga og‘ir gapirmay, qaysi rusumdagi mashinaga chiqsam ham “sen eng yaxshisisan” deb maqtayman, — deydi Ra’no Yarasheva.
Xosiyat Husanova: “O‘ldim deb o‘ylaganman”
— 2008-yili mudhish avariyaga uchraganman. Ammo bu mening emas, boshqa ansambldagi haydovchining aybi bilan sodir bo‘lgan. Baxtga qarshi men ham o‘sha mashinada edim. Men Damas’ning old o‘rindig‘ida edim. Chilonzorda ketayotganimizda u Nexia’ga urilib, rulni boshqarolmay daraxtga urilgan. O‘sha paytdagi ahvolimni tasvirlab berolmayman, “O‘ldim”, deb o‘ylaganman. Meni mashinadan olib chiqishlari juda qiyin kechgan. Ikki qo‘limdan bir necha marta tortishgach nafas ola boshlaganman. Menga kuchli miya chayqalishi va umurtqa pog‘onasining jiddiy shikastlanishi tashxisini qo‘yishgan. Bir yil to‘shakka mixlanib, 2-guruh nogironiga aylanganman. Hozir ahvolim ancha yaxshilangan, ammo kechga yaqin og‘riqlarim zo‘rayadi, — deydi Xosiyat Husanova.
Izoh (0)