Oila yoki karyera? Bu ayollar (va erkaklar) farzandlarining baxtli bolaligini ta’minlash uchun shon-shuhratini qurbon qilishdan qo‘rqmasdan, muammoni xotirjam va birgalikda hal qilishadi. Qanday qilib ular kameralarning odatiy miltillashisiz yashashga o‘rganishadi va nega mashhurlikka intilishmasa ham, ularning yulduzi so‘nmagan?
Jessika Bil (va biroz Jastin Timberleyk ham)
Bu yulduzli juftlik — har doim Gollivud bazm va kechalarining aziz mehmoni. Butun dunyo ularning oyoqlari ostida yotganga o‘xshaydi, ammo Jessika Bil va Jastin Timberleyk hech qachon Los-Anjeles elitasining imijini saqlashga mukkasidan ketmagan va o‘g‘il ko‘rganlarida ham xotirjam hayot kechirishda davom etishgan.
Er-xotin Los-Anjelesdagi hashamatli qasrdan Nyu-Yorkdagi shinam pentxausga ko‘chib o‘tishgan. Jastin hali ham ijod qilishda davom etayotgan bo‘lsa-da, Jessika o‘z jadvalini sezilarli darajada o‘zgartirdi. Intervyulardan birida aktrisa onalik qiyin bo‘lsa ham, u uchun birinchi o‘rinda ekanligini aytadi.
“Sizda boshqa tanlov bo‘lmaydi, — deydi Jessika, — Ish ishda qoladi. Uyda emas. Ba’zida shunchalik charchaymanki, shunchaki bir qadah sharob bilan dam olishni yoki raqsga tushishni xohlayman. Lekin har doim ham bunday qilolmayman. Chunki uyda sizni 2 yoshli bolakay kutmoqda, u siz bilan o‘ynashni xohlaydi. Va bu hamma narsadan muhim”.
Kris O‘Donnell
Kris O‘Donnell, “Ayol tarovati”, “Betmen va Robin” va “Bo‘ydoq” kabi filmlar yulduzi, o‘zi aytganidek, 25 yoshida “tormozni bosdi”. Aynan o‘sha paytda aktyor Gollivud loyihalaridagi ishtirokini to‘xtatishga va o‘zini bolalarni tarbiyalashga bag‘ishlashga qaror qiladi. “Menga kassabop filmlarda suratga tushishni taklif qilishdi, bu aktyorlik karyeramni yangi bosqichga olib chiqardi. Ammo men aktyorlikni davom ettirsam, hech qachon oila qura olmasligimni bilardim”, deydi aktyor.
Hozir Krisning besh o‘g‘il-qizi bor. U aktyorlik karyerasini tark etmadi, lekin 1990-yillarning oxiridan boshlab u ko‘p vaqt va kuch talab qilmaydigan o‘rtamiyona loyihalarda ishtirok etishni afzal ko‘radi.
Jennifer Garner
Ben Afflek va Jennifer Garner zamonaviy ota-onalardir. Ajrashganiga qaramay, sobiq turmush o‘rtoqlar uchta farzandining vasiyligini bo‘lishib, ularga normal va baxtli bolalikni ta’minlashga harakat qilishadi. Ammo Jennifer eridan ko‘ra ko‘proq harakat qiladi, chunki Afflek bilan turmush qurganida kinodagi faoliyatini qisqartirishdek qiyin qarorni qabul qiladi. Garchi er-xotin muqobil vazifalarni bajarishga rozi bo‘lishsa ham, kichkina Violet, Samuel va Serafina onalarini otalariga qaraganda tez-tez ko‘rishadi.
Tez orada Jennifer suratga olish maydonchasiga qaytdi, lekin bolalarini yolg‘iz qoldirishni istamadi. Aktrisa tez-tez qizlari va o‘g‘lini suratga olish maydoniga olib boradi va ular bilan vaqt o‘tkazish uchun muntazam ravishda tanaffus qilishga harakat qiladi.
Demi Mur
Demi Mur va Bryus Uillis bir vaqtlar Gollivuddagi eng yorqin juftliklardan biri bo‘lgan. Ular ikkalasi ham katta karyera, boylik, shon-shuhrat va ... oila qurish istagiga ega bo‘lganda bir-biri bilan tanishadi. To‘ydan bir yil o‘tgach, Demi va Bryusning Rumer Glenn ismli maftunkor qizi va bir necha yil o‘tgach, yana ikkita qizi — Skaut LaRu va Talula Belle dunyoga keladi. Garchi Demi o‘zining birinchi homiladorligini ochiqchasiga e’lon qilgan bo‘lsa-da, aktrisa qizlarini zamonaviy Beverli-Xillzdan uzoqda tarbiyalashga qaror qiladi.
Oila Aydahoga ko‘chib o‘tadi va Bryus Gollivudni zabt etishda davom etar ekan, Demi faqat yordamchi rollar bilan kifoyalanib, o‘zini butunlay bolalar tarbiyasiga bag‘ishlaydi. Mur xonimning sa’y-harakatlari o‘z samarasini beradi: hali 30 yoshga to‘lmagan katta qizi Rumer raqqosa va aktrisa sifatida mashhur bo‘ldi.
Juliya Roberts
Gollivud sohibjamoli Juliya Roberts uzoq vaqt davomida Amerikaning eng ko‘p maosh oladigan aktrisalaridan biri bo‘lib kelgan, toki u to‘satdan operator Daniel Moderga turmushga chiqib, uchta farzandni dunyoga keltirgach, ekranlardan g‘oyib bo‘lgunga qadar. Ona roli u uchun dunyodagi eng muhim narsaga aylandi. Uning uchun farzandlari — Heyzel, Finneas va Genrining tabassumi har qanday gonorardan qimmatroq edi.
Juliya shaxsiy va jamoat hayotini bir-biridan shunday ajratadiki, bolalari anchagacha onalarining dunyoga mashhur aktrisa ekanligini bilishmaydi ham. “Bir marta, — deb tan oladi aktrisa intervyusida, — ko‘chada ketayotgan edik. Kimdir meni tanib qoldi: Bu Juliya Roberts-ku! O‘g‘lim Finn esa: Ha, oyim Juliya Robinson, dedi. Mayli, Robinson bo‘lsin, Jonson bo‘lsin, bu muhim emas. Axir familiyam qanchalik mashhur bo‘lsa ham, mening kimligimga hech qanday aloqasi yo‘q”.
Karla Bruni-Sarkozi
Karla Bruni-Sarkozining karyerasi haqida gapirganda, “sobiq” so‘zini qayerda ishlatish muammo. Birinchi xonim? Top modelmi? Bastakormi? Darhaqiqat, ayol o‘tmishda bir necha bor monogamiya tarafdori emasligini tan olganiga qaramay, qizi Juliya tug‘ilishi bilan Karla o‘zini oilaga bag‘ishladi. Eri nihoyat siyosiy maydonni tark etgach, Karlani faqat hozirgi prezidentlarning rafiqalari haqidagi yangiliklarda eslab o‘tishadi, xolos.
Izoh (0)