Toshkent viloyatining Quyi Chirchiq tumanida daraxtlar noqonuniy kesib ketilgani aniqlandi. Bu haqda viloyat Ekologiya va atrof-muhitni muhofaza qilish boshqarmasi matbuot xizmati xabar qildi.
Ma’lum qilinishicha, bu haqda ijtimoiy tarmoqlarda xabar tarqalgach, Toshkent viloyati Ekologiya va atrof-muhitni muhofaza qilish boshqarmasi Quyi Chirchiq tuman bo‘limi hamda Toshkent viloyati Tabiatni muhofaza qilish prokuraturasi mas’ullari tomonidan joyiga chiqib o‘rganish olib borildi.
O‘rganish davomida “Madaniyat” MFY hududidan o‘tuvchi avtomobil yo‘li qatnov bo‘yidagi jami 7 dona shumtol noma’lum fuqarolar tomonidan 20-dekabrdan 21-dekabrga o‘tar kechasi kesib ketilgani aniqlangan. Holat yuzasidan tegishli tartibda dalolatnoma rasmiylashtirilib, tabiatga etkazilgan zarar miqdori 394 million so‘m, deb baholangan.
Qayd etilishicha, ayni paytda surishtiruv ishlari olib borilmoqda. O‘rganish natijalari yuzasidan qo‘shimcha ma’lumot beriladi.
Bundan avval Toshkent viloyatining Parkent tumanida 57 tup ko‘p yillik sog‘lom daraxtlar tag qismidan noqonuniy kesilgani aniqlangandi.
Mavzuga doir:
Izoh (0)