Бухорода ички ишлар профилактик инспекторига фаол қаршилик қилиб, унга жисмоний куч ишлатган қоракўллик шахс суд ҳукми билан бир йилга қамалди. Бу ҳақда Жиноят ишлари бўйича Қоракўл туман судига таяниб, “Хаbar.uz” хабар берди.
Суд ҳужжатларига кўра, Қоракўл туманининг “Мирзақалъа” маҳалласида яшовчи 33 ёшли О.Д. якка тартибдаги меҳнат фаолияти билан шуғулланиб келган. 2013 йилда қўшни маҳалладан уйланган. Улар уч нафар фарзанд кўришгач, ўзаро келишмовчилик сабабли 2022 йилда ажралган. Фарзандлари учун алимент тўлаб келаётган О.Д. шахсий келишмовчилик сабабли собиқ аёли ва унинг онаси билан ўзаро жанжаллашган ва ҳуқуқбузарлик содир этган.
Ҳолат юзасидан профилактика инспектори томонидан маъмурий баённома расмийлаштирилиб, судга оширилган. О.Д.нинг хатти-ҳаракатлари Жиноят ишлари бўйича Қоракўл туман суди томонидан кўриб чиқилиб, суд ҳукмига кўра, унга нисбатан Маъмурий жавобгарлик тўғрисидаги кодекснинг 183-моддаси (майда безорилик) қўлланилиб, етти сутка маъмурий қамоқ жазоси тайинланган.
Суд ҳукми ўқиб эшиттирилгач, айбдор ҳукмдан норози бўлиб, суд залида бақир-чақир қилганида, масъуллар ундан тинчланишни сўраган. Бироқ у ўз хатти-ҳаракатида давом этиб, қўлига кишан солмоқчи бўлган Қоракўл туман ИИБ профилактик инспектори Шерали Норқуловга нисбатан куч ишлатган. Инспекторнинг юз соҳасига боши билан бир маротаба зарб билан уриб, унга тан жароҳати етказган.
Бу ҳолат О.Д.га нисбатан қўлланиладиган жазо чорасининг кучайтирилишига сабаб бўлган.
“Маъмурий жазо олган фуқарога кейинги суд ҳукми билан жиноий жазо қўлланилди. Жиноят кодекси 219-моддасининг 1-қисмида назарда тутилган жиноятни содир қилганликда айбли деб топилиб, унга бир йил муддатга озодликдан маҳрум қилиш жазоси қўлланилди. Айбдор суд залида қамоққа олиниб, жазони манзил-колонияларда ўташи белгиланди”, — дейди суд раиси Жалол Садиров.
Изоҳ (0)