Navoiy viloyatida gaz taqsimlash stansiyasidagi hisoblagichga tashqi taʼsir ko‘rsatilishi natijasida davlat manfaatlariga 14,1 milliard so‘mlik zarar yetkazilgani maʼlum bo‘ldi. Bu haqda Energetika vazirligi axborot xizmati xabar berdi.
Xabarga ko‘ra, 2023-yil mart oyi Navoiy viloyatida o‘tkazilgan nazorat tadbiri davomida Qiziltepa tumani, “Malikobod” MFY hududida joylashgan Kogon magistral gaz quvurlari boshqarmasiga qarashli “Ho‘ja-Hasan” gaz taqsimlash stansiyasi sanoat kollektoriga o‘rnatilgan elektron gaz hisoblagichga tashqi taʼsir ko‘rsatilgani maʼlum bo‘ldi.
Dastlabki hisob-kitoblarga ko‘ra, davlat manfaatlariga yetkazilgan umumiy zarar miqdori 14,1 milliard so‘mni tashkil etgan. Ushbu sanoat kollektori orqali tadbirkorlik subyektlariga qarashli 3 ta avtomobillarga gaz to‘ldirish kompressor shoxobchasi va 3 ta issiqxona xo‘jaligiga tabiiy gaz yetkazib beriladi.
Mazkur holat yuzasidan hozirgi kunda huquqni muhofaza qiluvchi organlar tomonidan dastlabki surishtiruv ishlari olib borilmoqda.
Izoh (0)