Toshkentdagi to‘rtta AGTKSH tomonidan 7,1 milliard so‘mlik tabiiy gazdan noqonuniy foydalanish holatlari aniqlandi, deb xabar bermoqda Energetika vazirligi matbuot xizmati.
Qayd etilishicha, 13—29-mart kunlari “O‘zenergoinspeksiya” va huquqni muhofaza qiluvchi organlar bilan hamkorlikda Toshkent shahrida o‘tkazilgan nazorat tadbirlarida tadbirkorlik subyektlariga qarashli to‘rtta avtomobillarga gaz to‘ldirish kompressor shoxobchasi (AGTKSH) tomonidan tabiiy gazdan noqonuniy foydalanish holatlari aniqlandi.
Mazkur noqonuniy holatlar natijasida davlat manfaatlariga yetkazilgan umumiy zarar miqdori 7,1 milliard so‘mni tashkil etgan.
Jumladan:
- Yunusobod tumanida joylashgan AGTKSH tomonidan 2,372 milliard so‘mlik;
- Sergeli tumanida joylashgan AGTKSHda 1,728 milliard so‘mlik;
- Mirzo Ulug‘bek tumanida joylashgan AGTKSHda 1,607 milliard so‘mlik;
- Uchtepa tumanida joylashgan AGTKSHda tabiiy gazdan noqonuniy foydalanish natijasida davlat manfaatlariga yetkazilgan zarar miqdori 1,392 milliard so‘mni tashkil etgan.
Ushbu noqonuniy holatlarga huquqni muhofaza qiluvchi organlar tomonidan huquqiy baho berilmoqda. Hududlarda nazorat tadbirlari davom ettirilmoqda.
Izoh (0)