Antonio Konte “Tottenhem”ni tark etdi. Bu London klubi uchun Pochettinodan keyingi 3-iste’fo

“Tottenhem” bosh murabbiyi Antonio Konte londonliklar boshqaruvini tark etdi.

Klub ikkala tomonning kelishuvi asosida shartnoma bekor qilinganini ma’lum qildi. Mavsum oxirigacha jamoani Kristian Stellini boshqarib turadi, unga Rayan Meyson yordam beradi.

Konte “Tottenhem”ga 2021-yilning noyabrida kelgandi. O‘tgan mavsum jamoa Premyer Ligani 4-o‘rinda yakunladi. Ayni vaqtda ham “shporlar” 4-pog‘onada bo‘lib turibdi.

Konte qo‘l ostida “Tottenhem” APLda 56 ta o‘yin o‘tkazib, 32 g‘alaba, 9 durang va 15 mag‘lubiyat qayd etdi. Italiyalik murabbiy o‘rtacha har o‘yinda 1,88 ochko to‘plashga erishgan. Bu borada klubda kamida 38 ta o‘yin ishlagan murabbiylardan faqat Pochettino (1,89) undan yaxshiroq natija qayd etgan.

“Tottenhem” 2014—2019-yillar mobaynida jamoani boshqargan Maurisio Pochettinoning ketganidan keyin Joze Mourinyo (2019—2021), Nunu Eshpiritu Santu (2021) va Konteni (2021—2023) bosh murabbiylikka tayinladi. Ushbu mutaxassislarning barchasi bilan muddatidan avval shartnoma bekor qilindi.

Konte esa so‘nggi 12 yil ichida beshinchi jamoa boshqaruvini tark etdi. Konte bunga qadar “Aretsso” (2006–2007), “Bari” (2007—2009), “Atalanta” (2009–2010), “Siyena” (2010–2011), “Yuventus” (2011—2014), Italiya terma jamoasi (2014—2016), “Chelsi” (2016—2018) va “Inter”da (2019—2021) ishlagan.

Avvalroq “Tottenhem” Tomas Tuxel bilan muzokara olib borayotgani xabar qilingandi. Biroq germaniyalik mutaxassis “Bavariya” bosh murabbiyiga aylandi.