Антонио Конте “Тоттенҳэм”ни тарк этди. Бу Лондон клуби учун Почеттинодан кейинги 3-истеъфо

“Тоттенҳэм” бош мураббийи Антонио Конте лондонликлар бошқарувини тарк этди.

Клуб иккала томоннинг келишуви асосида шартнома бекор қилинганини маълум қилди. Мавсум охиригача жамоани Кристиан Стеллини бошқариб туради, унга Райан Мэйсон ёрдам беради.

Конте “Тоттенҳэм”га 2021 йилнинг ноябрида келганди. Ўтган мавсум жамоа Премьер Лигани 4-ўринда якунлади. Айни вақтда ҳам “шпорлар” 4-поғонада бўлиб турибди.

Конте қўл остида “Тоттенҳэм” АПЛда 56 та ўйин ўтказиб, 32 ғалаба, 9 дуранг ва 15 мағлубият қайд этди. Италиялик мураббий ўртача ҳар ўйинда 1,88 очко тўплашга эришган. Бу борада клубда камида 38 та ўйин ишлаган мураббийлардан фақат Почеттино (1,89) ундан яхшироқ натижа қайд этган.

“Тоттенҳэм” 2014—2019 йиллар мобайнида жамоани бошқарган Маурисио Почеттинонинг кетганидан кейин Жозе Моуриньо (2019—2021), Нуну Эшпириту Санту (2021) ва Контени (2021—2023) бош мураббийликка тайинлади. Ушбу мутахассисларнинг барчаси билан муддатидан аввал шартнома бекор қилинди.

Конте эса сўнгги 12 йил ичида бешинчи жамоа бошқарувини тарк этди. Конте бунга қадар “Арецсо” (2006–2007), “Бари” (2007—2009), “Аталанта” (2009–2010), “Сиена” (2010–2011), “Ювентус” (2011—2014), Италия терма жамоаси (2014—2016), “Челси” (2016—2018) ва “Интер”да (2019—2021) ишлаган.

Аввалроқ “Тоттенҳэм” Томас Тухель билан музокара олиб бораётгани хабар қилинганди. Бироқ германиялик мутахассис “Бавария” бош мураббийига айланди.