Hindistonda o‘tayotgan boks bo‘yicha ayollar o‘rtasidagi Jahon chempionatida shov-shuvli holat kuzatildi.
Xalqaro boks assotsiatsiyasi (IBA) genetik testdan o‘ta olmagan bir necha bokschini musobaqadan chetlatgan. Bu haqda tashkilot prezidenti Umar Kremlyov ma’lum qildi.
Genetik testlar o‘tkazilgandan keyin ma’lum bo‘ldiki, bir necha sportchida XY-xromosoma borligi ma’lum bo‘ldi va ular bellashuvlardan chetlatildi, — deydi Kremlyov.
Tabiiyki, qoidabuzarlar nomi e’lon qilinmagan. Turli OAVda xabar qilinishicha, gumonlanuvchilar orasida -66 kg vazn toifasida Jazoir sharafini himoya qilgan Imane Helif ham bo‘lgan. Helif final arafasida diskvalifikatsiya qilingan. Jang oldidan o‘tkazilgan gormon tahlillari sportchining tanasida testosteron moddasi me’yordan ko‘p ekanligini ko‘rsatgan.
Qayd etish kerak, Helif Jahon chempionatining chorak finalida O‘zbekiston vakili Navbahor Hamidovani mag‘lub etib, yarim finalga yo‘l olgandi. Final ostonasida esa tailandlik Suvannafengni taslim etgan.
Shu tariqa reglament bo‘yicha Imane Helifning barcha natijalari bekor qilindi va Hamidova yarim finalchi sifatida bronza medaliga ega chiqdi. Suvannafeng esa finalda xitoylik Yan Lyuga yutqazdi.
Imane Helifning o‘zi bu holatga munosabat bildirdi.
“Tashqi ko‘rinishim sabab mening ustimdan kulishmoqda. Bunga e’tibor bermaslikka harakat qildim va kurashda davom etdim. Bugun ularning fitnasi ish berdi, rostini aytsam shok holatidaman.
Ko‘plab musobaqalarda qatnashganman, hech qanday muammo bo‘lmagan, biroq oltin medal qo‘lga kiritishga imkoniyatlarim oshganidan keyin ular menga xalal berdi. Nima emish, mening mahoratim qolgan ayollardan ustun ekan”, — deydi Helif.
Shu tariqa O‘zbekiston delegatsiyasi Jahon chempionatini bitta bronza medali bilan yakunladi.
Izoh (0)