“Mustaqillik men uchun 2016-yildan boshlangan” — Matyoqub Matchonov nega bunday dedi?

Sirdaryo viloyati Guliston shahrida “Konstitutsiya o‘zimizniki” shiori ostida Konstitutsiyaviy qonun loyihasi bo‘yicha targ‘ibot tadbiri va konsert-shou dasturi bo‘lib o‘tdi. Unda mashhur san’atkorlardan Matyoqub Matchonov ham ishtirok etib, Mustaqillik u uchun 2016-yildan boshlanganini aytib, buning sababini tushuntirdi.

Tadbir davomida Konstitutsiyaga kiritilayotgan yangiliklar to‘g‘risida, shuningdek referendum o‘tkazish tartibi, unda ishtirok etish bo‘yicha huquqiy tushuntirishlar berildi. 

Matyoqub Matchonov inson qadri toptalgan davr, bundan bir necha yil ilgari tuhmat bilan, ko‘chadagi stolbani ham olib borib qamaydigan payt bo‘lganini yodga oldi. San’atkor shunday paytlarda uniyam olib borib tiqib qo‘yishganini aytdi.

“San’atkor bo‘lsam, ozgina tijorat bilan shug‘ullangan payt bo‘lgan. Nega qorong‘i “podval”da o‘tiribman, deb sababini so‘rasam, aybim ularni ta’biri bilan aytganda, ’ne to‘ odam bilan sherik bo‘lganim. Bir yarim oy Gvardeyskiy degan joyda o‘tirdim. U yerda ko‘rganlarimni dushmanimning dushmaniga ravo ko‘rmayman. Sababi u yerda hattoki hayvon sifatida ham murojaat qilishmasdi. Vaholanki, insonning aybdorligini, insonning gunohkorligini sud hal qiladi”, — dedi san’atkor.


U tergovga qarshi izolyatorda bo‘lgani, u yerda insonni aybini isbotlay olishmasa-da, xo‘rlashganini qayd etdi. Matchonov hattoki o‘zini qurbon qilishga tayyor bo‘lgani, xo‘rlik, tahqirlikka guvoh bo‘lgan odam hamma narsaga tayyor bo‘lishini aytdi.

”Shu bir oy ichida sudgacha bo‘lgan jarayonda jon taslim qilsam kerak, degan xayolga ham bordim. Nahotki insonni insonlar shu darajada tahqirlashi, xo‘rlashi mumkin? degan savol bor edi. U paytda mumkin ekan. Chunki bu narsa qonunimizda, qomusimizda belgilanmagan ekan. 2016-yil hurmatli prezident meni ozod qildi, nohaq qamalganimni isbot qildi. Men uchun haqiqiy mustaqillik 2016-yildan boshlangan. Buni istagan joyda baralla aytolaman”, — dedi u.

Matchonov tadbir ishtirokchilariga 30-aprelda referendumda qatnashib, ovoz berishini aytdi va referendum jarayonida befarq bo‘lmaslikka chaqirdi.