Qozog‘istonning Chimkent shahrida “O‘zbekiston temir yo‘llari” va “Qazaqstan temіr joli” o‘rtasida “Sariagash” davlatlararo tutashuv punktining yuk o‘tkazish salohiyatini oshirish uchun “Oq ko‘prik” (O‘zbekiston) va “Sariagash” (Qozog‘iston) stansiyalarida texnologik jarayonlarni takomillashtirish bo‘yicha muzokaralar bo‘lib o‘tdi.
“O‘zbekiston temir yo‘llari” matbuot xizmatining ma’lum qilishicha, uchrashuv davomida prognozlashtirilayotgan hajmlarga erishish va ularni yanada oshirish maqsadida “O‘zbekiston temir yo‘llari” tomonidan “Oq ko‘prik” stansiyasida rekonstruksiya jarayonida, mavjud bo‘lgan qabul qilish va jo‘natish yo‘llarni uzaytirilishi va qo‘shimcha yo‘llar qurilishi, 2023-yilning avgustiga qadar yakunlanishi haqida axborot berildi.
Ushbu loyihani amalga oshirish natijasida “Oq ko‘prik” chegara punkti orqali o‘tkazish imkoniyati kuniga 30 juft poyezddan 45 juft poyezdga oshiriladi va shunga mos ravishda yiliga yuk tashish hajmi 60 million tonnagacha oshishiga erishiladi. Shularni inobatga olgan holda, O‘zbekiston tomoni “Qazaqstan temіr joli”ga “Sariagash” stansiyasining o‘tkazish imkoniyatini oshirish uchun zarur choralarini ko‘rish lozimligi to‘g‘risida murojaat qildi.
Ushrashuvda poyezdlarni davlatlararo tutashuv punktlari orqali o‘tkazish jarayonini tezlashtirish maqsadida ikkala tomon ham yuklar to‘g‘risida o‘zaro dastlabki maʼlumotlarni to‘liq taqdim etish (predinfo), hamda texnik va tijoriy ko‘riklarini o‘tkazish vaqtini qisqartirish masalalari ham ko‘rib chiqilgan.