Marhum xonanda Mo‘min Oripovning onasi Jamila Oripova “Daryo”ga bergan intervyusida o‘g‘li avtohalokatga uchragan kundagi voqealar haqida so‘zlab berdi.
— Ajal kutilmagan paytda keladi. O‘g‘lim avtohalokatga uchramasidan avval Tojikistonga hamdo‘stlik konserti munosabati bilan borgandi. 28-iyun kuni gaplashganimda “Ona, biz O‘zbekistonga o‘tdik, hozir Surxondaryodamiz”, dedi. Ertasi kuni ertalab kichkina o‘g‘lim Ma’murxo‘ja “O‘zbekfilm” studiyasiga borganda Oybek va Nigoraning prodyuseri bilan uchrashgan. Undan avariya haqida eshitibdi. “Kechqurun gaplashgandim, yaxshi edi-ku”, deb o‘zimni yo‘qotib qo‘ydim. Eng yomoni, o‘lgan inson haqida ham turli bo‘htonlar tarqatishdi. Hatto o‘zimga ham bu haqda aytishganida qattiq ranjidim. “Ichib olib, mast bo‘lgan ekan, mashinada qizlar bilan ekan”, degan gaplar yuragimga og‘ir botdi. O‘zi mashinada to‘rtta yigit bo‘lsa, bundan tashqari, ularning hammasi ibodatda bo‘lsa, qanaqasiga bu taxminlar asosli bo‘lishi mumkin, dedim. O‘g‘lim kelinim Kamoladan boshqasiga qaramasdi. Ular bir-birini shunchalik yaxshi ko‘rardiki, Mo‘minxo‘janing boshqa qizga ko‘z suzishi haqida gap-so‘z ham bo‘lishi mumkin emasdi.
Kelinimni o‘g‘limning o‘zi topgandi. Bilsam, Javlon Shodmonov Jahon tillari universitetida konsert qilganida, Mo‘minxo‘ja Kamolani uchratib qolgan ekan. Dadasi rahmatli ham “Tanlaganini olib beramiz, bo‘lmasa, hayoti buzilib ketadi”, deb to‘yga qarshi bo‘lmagandi.
O‘g‘limning to‘yiga bir yarim ming odam kelgan bo‘lsa, janozasida o‘n mingdan ortiq odam ishtirok etdi. “Dom”ning atrofiga tumonat odam to‘lgan. Hatto janozasini o‘qiydigan domla “Qaysi vazirni olib kelishyapti?”, degan ekan. Yaqinda vafot etgan Farhod Mannopovning onasiga ham go‘zal sabr tilayman. Bu kunlar mening ham boshimdan o‘tgan. Farzandidan ayrilish og‘ir, ammo chidashdan o‘zga choramiz yo‘q.
Kamola va nabiram Bilolxo‘ja bilan aloqalarimiz yaxshi. Ko‘rgani kelishadi, hamisha ularni duo qilaman. Yaqinda ona-bola “Jiyda gulim” qo‘shig‘ini ijro etishibdi. Juda quvondim, ot o‘rnini toy bosganini ko‘rib, sahnada o‘g‘limni ko‘rgandek bo‘ldim.
Agar nabiram san’atkor bo‘lsa, otasining diplom ishini bermoqchiman. O‘g‘lim qisqa umr ko‘rdi, ammo sermazmun yashadi, deb o‘ylayman. Chunki vafot etganiga 14 yil bo‘ldi. Agar yomon inson bo‘lganida, odamlar allaqachon unutib yuborishgan bo‘lardi. Haligacha uyimizga kelib, hol-ahvol so‘raydigan muxlislari, hamkasblari bor. Kamolaning akasi o‘g‘liga Mo‘minxo‘ja deb ism qo‘ydi. Bizning uyda ham kichik Mo‘minxo‘ja bor. Bir nechta do‘stlari ham o‘g‘limga havas qilib, farzandiga shu ismni qo‘ydi. Ilohim, hammalarining farzandlari o‘g‘limdek aqlli-hushli, iymonli bo‘lishsin. Ammo hech birlarining hayoti Mo‘minxo‘janikidek qisqa bo‘lmasin.
Javlon Shodmonov Mo‘minxo‘ja bilan sinfdosh bo‘lgan. U Jahongir Poziljonov bilan birga meni Umra safariga jo‘natdi. Turmush o‘rtog‘im vafot etganida ham Mo‘minxo‘janing o‘rniga o‘g‘il bo‘lib, oxirgi manzilga kuzatishdi. Ulardan minnatdorman, — deydi Mo‘min Oripovning onasi Jamila Oripova.
Quyida suhbatni to‘liq holda tomosha qilishingiz mumkin.
Izoh (0)