Ulug‘bek Shodibekov “Mittivine” kulgi jamoasi faoliyatini qanday davom ettirishi haqidagi savolga javob berdi (video)

“Mittivine” jamoasi a’zosi Ulug‘bek Shodibekov marhum do‘sti, bloger Farhod Mannopovning jamoadagi o‘rni va keyingi faoliyati haqida gapirib berdi.

“Jamoada ham, o‘zimda ham ruhiy sinish bo‘ladi, deb qo‘rqayotgan edim”

— Farhod bitta gapni ko‘p qaytarardi, biz jamoani yig‘madik, yig‘ilib qoldik. Biz haqiqatan ham jamoani yig‘maganmiz, yuragida o‘ti bor bolalar yig‘ilib, shunday bo‘ldik. Farhodning orzularini amalga oshirishimiz uchun ham, qo‘limizdan yana ko‘proq narsa kelishini ko‘rsatib berish uchun ham biz to‘xtamaymiz. Yana ham ko‘proq harakat qilamiz. Jamoada ham, o‘zimda ham ruhiy sinish bo‘ladi, deb qo‘rqayotgan edim. Hamma bir-biriga qarayapti, hech kimning uyga borgisi kelmayapti.

“Onasining bizga aytgan bir gapi yanada dalda bo‘ldi”

— Lokatsiya belgiladik-da, o‘sha yerga borib hamma narsani kelishdik. O‘tiribmiz, hammamiz bir-birimizga dalda bo‘lyapmiz. Alloh mehribon, shu vaziyatdan tezroq chiqib ketishimizga yordam berdi. O‘rtaga mavzuni tashlash, qanaqa boshlash, nima qilsak, qaysi tomondan borsak to‘g‘ri bo‘ladi, deb kelishib oldik. Hozir shuni harakatini boshladik. Onasining bizga aytgan bir gapi yanada dalda bo‘ldi.

“Ko‘proq, kuchliroq ishlashingiz kerak, Farhod tirik bo‘lganida ham shuni xohlagan bo‘lardi. Hali uning qiladigan ishlari ko‘p edi, o‘sha ko‘p ishni endi sizlar qilishingiz kerak”, deb aytdi. Shundan keyin o‘zimizda kuch topdik, insonlar Farhodni his qilishi kerak bo‘lgan narsalarni maksimal darajada qilamiz. Farhodning o‘rni boshqa edi, biz bu gaplarni to‘g‘ri qabul qilamiz. Bu narsani to‘ldirishga harakat qilamiz, o‘rnini bosamiz, deya olmayman.