Mel Gibson 10 ta aka-uka va opa-singillar bilan o‘sgan, Mark Uolberg esa 9 nafar farzandning eng kichigi ekanini ko‘pchilik bilmaydi. Bo‘lajak mashhurlar ba’zan qiyin sharoitlarda ulg‘ayishiga to‘g‘ri kelganiga qaramay, muvaffaqiyatli karyera qurishni uddalashdi.
Madonna
Madonna oilada 3-farzand bo‘lib, undan keyin yana uchta farzand dunyoga keladi. Shunday qilib, bo‘lajak qo‘shiqchi besh aka-uka va singlisi bilan o‘sadi. Ularning onasi rentgenolog, otasi esa muhandis bo‘lib ishlagan. Madonna atigi 5 yoshida onasi vafot etadi, 2 yildan keyin otasi uy xizmatchisiga uylandi. Bo‘lajak yulduz otasining qayta turmush qurishidan norozi edi, bu esa otasi bilan kelajakdagi munosabatlarida ma'lum iz qoldiradi. Shunga qaramay, uni pianino darslariga yuborgan otasi edi.
Intervyularining birida Madonna shunday deydi: “Sizlarga odob-axloqni onalaringiz o‘rgatgan. Ammo men bu haqida mutlaqo bilmasdim, chunki onam bu dunyoni juda erta tark etdi”. Onasining fojiali o‘limidan keyingi bo‘shliq va sog‘inch uni muvaffaqiyat sari intilishga undaganini qo‘shimcha qiladi: “Meni sevadigan onam yo‘qligi uchun ham butun dunyoni meni sevishga majbur qildim”.
Mark Uolberg
Mark Uolberg ham katta oilada tug‘ilgan — u 9 farzandning eng kichigi bo‘lgan. Uning otasi yuk mashinasi haydovchisi, onasi hamshira edi. Bola 11 yoshga to‘lganda ota-onasi ajrashishadi, shundan keyin Mark juda yovvoyi hayot kechira boshlaydi. U o‘sha davr haqida shunday deydi: “Ota-onam bizlarni taqdir hukmiga tashlashdi, shuning uchun doimo muammoga duch kelardik. Biz o‘zimizda yo‘q narsani olishni xohlardik, shuning uchun ham boshimiz muammodan chiqmasdi”.
Uolbergning onasi 2021-yilda vafot etdi. Ijtimoiy tarmoqda u u haqida ta'sirli videoni joylashtirdi va shunday so‘zlar yozilgan uzun post yozdi: “Meni bu dunyoga shunday ajoyib inson keltirganidan, o‘stirganidan va to‘g‘ri hayot yo‘liga yo‘naltirganidan juda xursandman. Ko‘pgina onalar singari u qiyinchiliklarni yengib, farzandlari uchun imkonsiz narsaga erishdi, u hech qachon shikoyat qilmadi. Onam har doim hamma narsani tabassum bilan qildi. U menga eng yomon paytlarda ham eng yaxshi damlarni berdi”.
Mel Gibson
Mel Gibson 11 bolaning 6-chi edi. Uning otasi advokat, onasi o‘qituvchi bo‘lgan. Gibson 9 yoshida onasi vafot etadi, shuning uchun otasi bolalarni yolg‘iz o‘zi tarbiyaladi. Melning so‘zlariga ko‘ra, aynan otasi ularga halollik, mehnatsevarlik va boshqa ko‘plab qadriyatlarni singdirgan. Dastlab Mel oshpaz yoki jurnalist bo‘lishni o‘ylagan, ammo uning opalaridan biri akasi nomidan Milliy drama san'ati institutiga hujjat topshiradi. Yigit kastingga taklif qilinadi va aktyorlik tajribasi yo‘qligiga qaramay, teatr maktabiga olinadi.
Aytgancha, uning ukalaridan biri ham aktyor, ammo Mel unga qaraganda ko‘plab mukofotlarga sazovor bo‘lgan taniqli aktyor hisoblanadi. Gibsonning hozirda 9 nafar farzandi bor — u deyarli ota-onasini quvib yetdi.
Maykl Jekson
Bo‘lajak estrada qiroli ishchilar oilasida tug‘ilib, 8 aka-uka va opa-singillari bilan o‘sgan. Ular 2 ta yotoqxonasi bo‘lgan kichkina uyda yashashgan. Mayklning ota-onasi musiqaga befarq emasdi: otasi gitara, onasi esa klarnet va pianino chalishni bilardi. Erta bolalikdan Maykl aka-uka va opa-singillari bilan The Jekson 5 ning bir qismi sifatida musiqa chalishgan, otasi esa guruh menejeri sifatida ro‘yxatga olingan. Otasi o‘g‘liga uning burni kattaligini doim aytardi, bu esa kelajakda xonandaning tashqi ko‘rinishidan doimiy noroziligiga sabab bo‘ladi.
Jeksonning so‘zlariga ko‘ra, u bolaligida doimiy yolg‘izlik tuyg‘usini boshdan kechirgan, shu sababli ham tez-tez yig‘lab turgan. Xonanda buni do‘stlar yetishmasligi va doimiy ishlash bilan izohlagan.
Bill Myurrey
Bill Myurrey yog‘och sotuvchisi va pochta ishchisi oilasida tug‘ilgan to‘qqiz farzandning beshinchisi bo‘lgan. Bo‘lajak aktyor haqiqiy bezori bo‘lib o‘sadi, lekin u juda ko‘p qobiliyatlarga ega edi: u golf, futbol o‘ynardi, shuningdek, maktab teatr truppasining a'zosi edi. Ota fidoyi oila boshlig‘i bo‘lib, u butun qalbini bolalarini tarbiyalashga bag‘ishlaydi va ularning kelajakdagi muvaffaqiyatiga o‘z hissasini qo‘shadi. Bill 17 yoshida otasi diabetdan vafot etadi. Bu hamma uchun katta zarba bo‘ladi. Onasi ham oilasini cheksiz yaxshi ko‘rar, doim kechki ovqatlar uyushtirar, do‘stlari va qarindoshlarini uyiga chaqirardi. Onasi 67 yoshida saraton kasalligidan vafot etadi.
Intervyularidan birida Bill shunday katta oilani juda yaxshi ko‘rishini aytadi: “Hayotda yolg‘iz qolish juda qiyin. Ammo eng yaqin munosabatlaringizni baham ko‘rishingiz mumkin bo‘lgan aka-uka yoki opa-singilingiz bo‘lsa, bu juda yaxshi. Billning hozirda 6 nafar farzandi bor.
Enrike Iglesias
Enrike Iglesias — Xulio Iglesiasning 8 farzandining 3-si. Enrike 2 yoshga to‘lganda ota-onasi ajrashadi, otasining ikkinchi nikohidan yana 5 nafar farzandi bor edi. Ajralishdan so‘ng bir muncha vaqt bolalar onasi bilan yashaydi, keyin ular otasinikiga ko‘chib o‘tishga majbur bo‘lishadi. U yerda ularni asosan enagasi Elvira Olivares tarbiyalagan, Enrike undan juda minnatdor bo‘lib, hatto birinchi albomini unga bag‘ishlagan.
Enrikening otasi Xulio Iglesias o‘sha paytda allaqachon taniqli qo‘shiqchi bo‘lgan, ammo o‘g‘li otasining yordamidan foydalanishni istamaydi va yashirincha demoversiya yozib, uni prodyuserga beradi. Enrikening aytishicha, agar ota-onasi uning qo‘shiqchi bo‘lish istagini bilishsa, rozi bo‘lishmasdi. Shunga qaramay, xonanda baxtli bolaligi uchun ota-onasidan cheksiz minnatdor.
Rianna
Riannaning 5 ta aka-uka va opa-singillari bor — ulardan ikkitasi tug‘ishgan, uchtasi otasining avvalgi munosabatlaridan bo‘lgan aka-ukalaridir. Riannaning onasi buxgalter, otasi esa kiyim-kechak fabrikasida ombor inspektori bo‘lib ishlagan. Ko‘pincha qizi ishdagi kichik topshiriqlarni bajarib, otasiga yordam berardi.
Bo‘lajak qo‘shiqchi 14 yoshida ota-onasi ajrashishadi, u otasi bilan munosabatlarini to‘xtatadi. Bir muncha vaqt o‘tgach, ota va qiz yarashadi. Bugungi kunda qo‘shiqchi otasini “sayyoradagi eng zo‘r odam" deb ataydi.
Selin Dion
Selin Dion 14 farzandning eng kichigi edi. 13-farzandi tug‘ilgandan keyin onasi boshqa farzand ko‘rmaslikka qaror qiladi. Ammo rejalashtirilmagan tarzda Selin dunyoga keladi. Ularning oilasi juda oddiy, kamtarona daromadga ega edi, ammo shunga qaramay, oila a'zolarining hech biri hech qachon mehrdan mahrum bo‘lmagan. Ularning uyida juda ham tor bo‘lgan. Hamma bolalarining musiqaga ishtiyoqi bor edi, lekin onasi kenja qizining ajoyib iste'dodi borligini payqaydi. U Selin ijro etgan qo‘shiqlarni kassetaga yozib, musiqa menejeriga yuboradi. Shundan keyin Selinning omadli karyerasi boshlanadi.
“Onam ajoyib ayol edi. U otam bilan birga 14 farzandni tarbiyalagan. Pul yetishmasa-da, uyimiz mehrga to‘la edi. Onam qo‘shiq aytishni yaxshi ko‘rardi va hatto men uchun qo‘shiq yozib bergan. Bu qo‘shiq repertuarimda birinchisi bo‘ldi. Onam hazil tuyg‘usiga ega ayol edi va men uchun haqiqiy qahramon bo‘lgan”, — deydi xonanda.
Izoh (0)