Чехиянинг янги президенти Пётр Павел сайловолди кампаниясида ҳомийлар тўғрисида етарлича маълумот бермагани учун 60 минг чех крони (қарийб 2,7 минг доллар) миқдорида жаримага тортилди, деб хабар бермоқда Чехия телеканали.
“Президент Павел Сиёсий партияларнинг иқтисодий фаолиятини назорат қилиш бошқармаси томонидан рекорд даражадаги 60 минг крон жаримага тортилди. Жарима президентлик кампаниясида ҳомийлар ҳақида тўлиқ бўлмаган маълумотлар учун киритилди. Буни журналистларга ушбу идора ходими Ян Оутли тасдиқлади”, — дейилади хабарда.
Оутлининг айтишича, Павелнинг сайловолди жамғармаси ҳомийларидан айримлари тўғрисида маълумотлар, масалан, уларнинг яшаш жойи ва туғилган саналари ҳақида маълумотларнинг етишмаслиги жаримага сабаб бўлган, чунки бу ҳужжатларда энг кўп учраган камчилик эди.
“Агар сизда 6 000 ҳомий бўлса ва уларнинг барчаси манзили ва туғилган санаси каби маълумотларни тақдим этиши керак бўлса-ю, лекин айримлари маълумот бермаган бўлса, бизда ўша одамлардан бу маълумотларни олиш имкони йўқ”, — дея Павелнинг Польшага сафари чоғида журналистлар билан суҳбатда жаримани изоҳлаган.
“Менимча, буларнинг барчаси тушунарли, менда ҳеч қандай муаммо йўқ, чунки баъзан шунақаси ҳам бўлиб туради”, — дейди 13 март куни жаримани тўлаган Чехия президенти.
Оутлининг сўзларига кўра, унинг бошқармаси жисмоний шахсга биринчи марта бундай катта миқдорда жарима солмоқда, одатда, фақат юридик шахсларга бу миқдорда жарима солинган.
Изоҳ (0)