Pokistonda Islomobod Oliy sudi raisi Aamer Faruk razvedka hisobotiga tayanib, sobiq bosh vazir Imron Xonning hayoti xavf ostida ekanini ma’lum qildi. Bu haqda Al Jazeera xabar berdi.
Hisobotga ko‘ra, siyosatchiga navbatdagi suiqasd uyushtirilishi xavfi bor. 70 yoshli Imron Xon 3-noyabr kuni Islomoboddagi muddatidan oldin saylov o‘tkazish talabi bilan norozilik marshini o‘tkazayotganda otishma oqibatida yaralangandi. Faruk siyosiy norozilik namoyishi paytida poytaxtdagi yo‘llarni yopish to‘g‘risida savdo organi tomonidan berilgan petitsiyani ko‘rib chiqish jarayonida buni ma’lum qildi.
Noyabr boshida sobiq bosh vazirga qilingan hujumda Imron Xonning Pokiston “Tehrik-e-Insaf” (PTI) partiyasi tarafdori halok bo‘lgandi. O‘ndan ortiq odam yaralangan, bu esa partiyani yurishni to‘xtatishga majbur qilgan.
Pokistonning amaldagi bosh vaziri Shahbaz Sharif, ichki ishlar vaziri Rana Sanaulloh va harbiy general Faysal Nosir hujumni rejalashtirganlikda ayblangan. Xon o‘z da’volari uchun hech qanday dalil keltirmagan. Gumonlanuvchi qo‘lga olinib, politsiya tomonidan so‘roq qilinmoqda.
18-noyabr kuni bo‘lib o‘tgan sud majlisida politsiya mahkamaga razvedka hisobotini taqdim etgan. Unda Xon Islomobodda qayta yurish boshlasa, unga yana hujum qilish ehtimoli borligi keltiriladi. Sudya Imron Xonning partiyasidan mitingni Islomobodda o‘tkazishga ruxsat olish uchun yangi ariza topshirishni so‘ragan. U politsiyani yurish qatnashchilari shaharga yetib kelganlarida xavfsizligini ta‘minlashga chaqirdi.
Mavzuga doir:
Izoh (0)