O‘zbekiston bosh vazirining o‘rinbosari Jamshid Xo‘jayev boshchiligidagi delegatsiya Shveysariyaning Jeneva shahrida amaliy tashrif bilan bo‘lib turibdi, deb xabar beradi O‘zA.
Qayd etilishicha, rejaga ko‘ra ayni vaqtgacha, xalqaro tashkilot vakillari bilan bir qator uchrashuvlar o‘tkazilgan. Xususan, Xo‘jayev Jahon savdo tashkiloti bosh direktori Ngozi Okonjo-Iveala bilan muzokara o‘tkazgan.
Uchrashuv chog‘ida O‘zbekistonning JSTga qabul qilinish jarayonini tezlashtirish masalasi, jumladan, 14–15-mart kunlari ishchi guruhning 6-yig‘ilishini o‘tkazish imkoniyati muhokama qilingan. Jarayonni jadallashtirish maqsadida barcha aʼzo davlatlar bilan tovar va xizmat bozoriga kirib borish yuzasidan ikki tomonlama muzokaralarni faollashtirish, muloqotlar yakuni bo‘yicha tegishli bayonnomalar imzolash zarurligi qayd etilgan.
JST bosh direktori O‘zbekiston hukumati tomonidan JSTga qo‘shilish maqsadida olib borilayotgan saʼy-harakatni, jumladan, yirik aʼzo davlatlar bilan ikki tomonlama muzokaralarni yuqori baholagan. Uning so‘zlariga ko‘ra, O‘zbekistonning faolligi, tashabbuskorligi tufayli mavjud hamkorlik ijobiy o‘sish surʼatini namoyon qilmoqda.
Jenevada kun tartibidan o‘rin olgan O‘zbekistonning JSTga aʼzo bo‘lishi bo‘yicha Ishchi guruhning 6-yig‘ilishida, ikki kun davomida respublika savdo rejimining barcha jihatlariga taalluqli 10 dan ziyod yangi hujjat ko‘rib chiqiladi.
Eslatib o‘tamiz, 2022-yilning dekabrida Jenevada O‘zbekistonning JSTga a’zo bo‘lish jarayonini yanada jadallashtirish bo‘yicha kelishuvga erishilgan edi.
Izoh (0)