Ўзбекистон бош вазирининг ўринбосари Жамшид Хўжаев бошчилигидаги делегация Швейцариянинг Женева шаҳрида амалий ташриф билан бўлиб турибди, деб хабар беради ЎзА.
Қайд этилишича, режага кўра айни вақтгача, халқаро ташкилот вакиллари билан бир қатор учрашувлар ўтказилган. Хусусан, Хўжаев Жаҳон савдо ташкилоти бош директори Нгози Оконжо-Ивеала билан музокара ўтказган.
Учрашув чоғида Ўзбекистоннинг ЖСТга қабул қилиниш жараёнини тезлаштириш масаласи, жумладан, 14–15 март кунлари ишчи гуруҳнинг 6-йиғилишини ўтказиш имконияти муҳокама қилинган. Жараённи жадаллаштириш мақсадида барча аъзо давлатлар билан товар ва хизмат бозорига кириб бориш юзасидан икки томонлама музокараларни фаоллаштириш, мулоқотлар якуни бўйича тегишли баённомалар имзолаш зарурлиги қайд этилган.
ЖСТ бош директори Ўзбекистон ҳукумати томонидан ЖСТга қўшилиш мақсадида олиб борилаётган саъй-ҳаракатни, жумладан, йирик аъзо давлатлар билан икки томонлама музокараларни юқори баҳолаган. Унинг сўзларига кўра, Ўзбекистоннинг фаоллиги, ташаббускорлиги туфайли мавжуд ҳамкорлик ижобий ўсиш суръатини намоён қилмоқда.
Женевада кун тартибидан ўрин олган Ўзбекистоннинг ЖСТга аъзо бўлиши бўйича Ишчи гуруҳнинг 6-йиғилишида, икки кун давомида республика савдо режимининг барча жиҳатларига тааллуқли 10 дан зиёд янги ҳужжат кўриб чиқилади.
Эслатиб ўтамиз, 2022 йилнинг декабрида Женевада Ўзбекистоннинг ЖСТга аъзо бўлиш жараёнини янада жадаллаштириш бўйича келишувга эришилган эди.
Изоҳ (0)