O‘zbekistonning JSTga a’zo bo‘lish jarayoni yanada jadallashtiriladi

Jenevada O‘zbekistonning JSTga a’zo bo‘lish jarayonini yanada jadallashtirish bo‘yicha kelishuvga erishildi. Bu haqda Investitsiyalar va tashqi savdo vazirligi matbuot xizmati xabar qildi.

Ma’lum qilinishicha, investitsiyalar va tashqi savdo vaziri o‘rinbosari, Jahon savdo tashkiloti bilan ishlash bo‘yicha muzokaralar guruhi rahbari Badriddin Abidov O‘zbekistonning tashkilotga a’zo bo‘lishi doirasida JSTga a’zo davlatlar bilan bir qator ikki tomonlama muzokaralar o‘tkazish hamda UNCTAD/JST xalqaro savdo markazi (XSM) tomonidan tashkil etilgan Tashqi savdo strategiyalari forumida ishtirok etish maqsadida 7—9-dekabr kunlari Jenevada bo‘ldi.

Tashrif davomida AQSH, Yevropa Ittifoqi, Xitoy, Saudiya Arabistoni, Qatar, Turkiya, Singapur va boshqalar kabi 14 davlatning Tashkilotdagi diplomatik vakolatxonalari rahbarlari va ekspertlari bilan O‘zbekistonning JSTga a’zo bo‘lishi yuzasidan navbatdagi muzokaralar olib borildi.

Shuningdek, JST bosh direktori o‘rinbosari J-M.Pogam va tashkilot kotibiyatining qo‘shilish bo‘limi boshlig‘i M.Oshikava bilan uchrashuvlar bo‘lib o‘tdi.

Muzokaralar chog‘ida O‘zbekistonning JSTga a’zo bo‘lishi bo‘yicha ishchi guruhining 6-yig‘ilishini tashkil etishga tayyorgarlik ko‘rish bo‘yicha amalga oshirilayotgan ishlar, bu jarayonni yanada jadallashtirish bo‘yicha amaliy chora-tadbirlar bilan bog‘liq masalalar muhokama qilindi. JSTga a’zo davlatlar bilan bozorlariga respublika tovar va xizmatlarining chiqishi bo‘yicha alohida muzokaralar olib borildi.

Davlatlar vakillari va JST kotibiyati ta’kidlashicha, O‘zbekiston Tashkilotga a’zo mamlakatlarga ishchi guruhning 6-yig‘ilishini tashkil etish uchun barcha zarur yangi hujjatlarni, jumladan manfaatdor davlatlarning savollariga yozma javoblarni, milliy qonunchilikni JST qoidalariga muvofiqlashtirishga qaratilgan choralar rejasi, sanitariya va fitosanitariya choralari, savdodagi texnik to‘siqlar, bojxona qiymatini baholash, intellektual mulk, tovarlar importini litsenziyalash va boshqa masalalar bo‘yicha yangilangan hujjatlarni taqdim etgan.

Muzokaralar yakunida O‘zbekistonning JSTga a’zo bo‘lish jarayonini yanada jadallashtirish, jumladan tashkilotning tadbirlar jadvaliga muvofiq 2023-yil boshida ishchi guruhning 6-yig‘ilishini o‘tkazish bo‘yicha kelishuvga erishildi.

Mavzuga doir:

• “Biz uchun JSTga qo‘shilish mutlaq ustuvor vazifa” –  tashqi savdo vaziri o‘rinbosari Badriddin Obidov
• O‘zbekiston JSTga a’zo bo‘lish uchun faol muzokaralar olib bormoqda – Investitsiyalar va tashqi savdo vazirligi