Улуғбек Шодибеков “Mittivine” кулги жамоаси фаолиятини қандай давом эттириши ҳақидаги саволга жавоб берди (видео)

“Mittivine” жамоаси аъзоси Улуғбек Шодибеков марҳум дўсти, блогер Фарҳод Манноповнинг жамоадаги ўрни ва кейинги фаолияти ҳақида гапириб берди.

“Жамоада ҳам, ўзимда ҳам руҳий синиш бўлади, деб қўрқаётган эдим”

— Фарҳод битта гапни кўп қайтарарди, биз жамоани йиғмадик, йиғилиб қолдик. Биз ҳақиқатан ҳам жамоани йиғмаганмиз, юрагида ўти бор болалар йиғилиб, шундай бўлдик. Фарҳоднинг орзуларини амалга оширишимиз учун ҳам, қўлимиздан яна кўпроқ нарса келишини кўрсатиб бериш учун ҳам биз тўхтамаймиз. Яна ҳам кўпроқ ҳаракат қиламиз. Жамоада ҳам, ўзимда ҳам руҳий синиш бўлади, деб қўрқаётган эдим. Ҳамма бир-бирига қараяпти, ҳеч кимнинг уйга боргиси келмаяпти.

“Онасининг бизга айтган бир гапи янада далда бўлди”

— Локация белгиладик-да, ўша ерга бориб ҳамма нарсани келишдик. Ўтирибмиз, ҳаммамиз бир-биримизга далда бўляпмиз. Аллоҳ меҳрибон, шу вазиятдан тезроқ чиқиб кетишимизга ёрдам берди. Ўртага мавзуни ташлаш, қанақа бошлаш, нима қилсак, қайси томондан борсак тўғри бўлади, деб келишиб олдик. Ҳозир шуни ҳаракатини бошладик. Онасининг бизга айтган бир гапи янада далда бўлди.

“Кўпроқ, кучлироқ ишлашингиз керак, Фарҳод тирик бўлганида ҳам шуни хоҳлаган бўларди. Ҳали унинг қиладиган ишлари кўп эди, ўша кўп ишни энди сизлар қилишингиз керак”, деб айтди. Шундан кейин ўзимизда куч топдик, инсонлар Фарҳодни ҳис қилиши керак бўлган нарсаларни максимал даражада қиламиз. Фарҳоднинг ўрни бошқа эди, биз бу гапларни тўғри қабул қиламиз. Бу нарсани тўлдиришга ҳаракат қиламиз, ўрнини босамиз, дея олмайман.