Futbol bo‘yicha O‘zbekiston U-20 terma jamoasi o‘z mezbonligida o‘tayotgan Osiyo Kubogi—2023 chorak finalida Avstraliyani mag‘lub etib (1:1, 5:4), Jahon chempionati yo‘llanmasiga ega chiqdi.
“Daryo” shu munosabat bilan O‘zbekiston yoshlar va o‘smirlar terma jamoalarining “kichik mundial”lardagi ishtiroki tarixi haqida so‘z yuritadi.
Yoshlar o‘rtasidagi Jahon chempionati — 2003
2003-yilgi musobaqa O‘zbekiston yoshlar terma jamoasi uchun ilk Jahon chempionati bo‘lgandi. 27-noyabrdan 19-dekabrga qadar BAAda o‘tkazilgan kichik mundialda O‘zbekiston terma jamoasi Argentina, Ispaniya, Mali kabi terma jamoalar bilan birgalikda B guruhidan o‘rin oladi. Maliga qarshi birinchi uchrashuvda O‘zbekiston yoshlari 2:3 hisobida mag‘lubiyatga uchradi. Islom Inomov va Aleksandr Geynrix gollar muallifiga aylandi.
Ikkinchi turda Argentina bilan bahs olib borgan O‘zbekiston ilk daqiqalarda Aleksandr Geynrix tomonidan urilgan gol evaziga hisobni ochdi. Ammo Argentina 70-daqiqada Leandro Fernandes va 90+3-daqiqada Fernando Kavenagining gollari evaziga 3 ochkoni ilib ketadi. Uchinchi turda esa O‘zbekiston Ispaniya yoshlari bilan to‘qnash keldi. 15-daqiqada Andres Inyesta tomonidan urilgan gol o‘yinda yagonaligicha qoladi va O‘zbekiston uchinchi o‘yinda ham mag‘lubiyatni qabul qilib oldi. Shu tariqa O‘zbekiston yoshlar terma jamoasi uchun ilk musobaqa omadsiz boshlandi.
Yoshlar o‘rtasidagi Jahon chempionati — 2009
O‘zbekiston yoshlar terma jamoasi 2009-yilgi Jahon chempionatida D guruhidan o‘rin oladi. Raqiblar esa Gana, Urugvay va Angliya kabi kuchli jamoalar edi. Birinchi turda bo‘lajak jahon chempioni Ganaga qarshi maydonga tushgan o‘zbekistonlik yigitlar 2:1 hisobida mag‘lubiyatga uchradi. O‘zbekistonning yagona goliga Sherzod Karimov mualliflik qildi.
Ikkinchi turda Urugvay yosh “oq bo‘rilar”ga hech qanday imkoniyat qoldirmaydi va 3:0 hisobida g‘alaba qozondi. Oxirgi turda esa Angliyaga qarshi uchrashuvda Ivan Nagayev 1 ochko keltirgan gol muallifiga aylandi. Durang natija bilan O‘zbekiston guruhda uchinchi o‘rinni egalladi va bu keyingi bosqichga chiqish uchun kamlik qildi.
O‘smirlar o‘rtasidagi Jahon chempionati — 2011
Meksika mezbonligida o‘tgan turnirda o‘zbekistonlik o‘smirlar AQSH, Yangi Zelandiya va Chexiya bilan bir guruhdan joy oladi. Dastlabki turda kutilmaganda Yangi Zelandiyadan yirik hisobdagi mag‘lubiyatni (1:4) qabul qilib olgan Aleksey Yevstafeyev shogirdlari keyingi o‘yinlarda raqiblarini bir xil 2:1 hisobida taslim etadi va birinchi o‘rin bilan nimchorak finalga yo‘l oladi.
1/8 finalda Avstraliya 4:0 hisobida taslim etiladi. O‘sha mundial yulduzlari Abbosbek Maxstaliyev va Temur Hakimov bittadan to‘p kiritgan, shuningdek, Davlat Yorbekov ham o‘z hisobiga gol yozdirib qo‘ygandi. O‘zbekiston chorak finalda keyinchalik finalga qadar yetib borgan Urugvayga yengiladi (0:2).
O‘smirlar o‘rtasidagi Jahon chempionati — 2013
Dilshod Nuraliyev qo‘l ostidagi jamoa musobaqa guruh bosqichida Marokash, Xorvatiya va Panamaga qarshi bahs olib boradi. Dastlabki turda Shohjahon Abbosov va Rustam Ashurmatov tomonidan urilgan gollar Panama ustidan g‘alabani ta’minlaydi. Marokash bilan durang qayd etiladi (0:0). Hal qiluvchi turda Xorvatiyaga imkon qoldirilmaydi (2:0). Nimchorak finalda O‘zbekiston o‘smirlari Gondurasdan alamli mag‘lubiyatni qabul qilib (0:1), musobaqa bilan xayrlashadi.
Yoshlar o‘rtasidagi Jahon chempionati — 2013
Turkiya maydonlarida o‘tgan musobaqa hozirga qadar O‘zbekiston yoshlar terma jamoasi uchun eng yaxshi Jahon chempionati bo‘lib turibdi. F guruhidan o‘rin olgan O‘zbekiston yoshlari Xorvatiya, Urugvay va Yangi Zelandiya bilan bahs olib boradigan bo‘ldi. Birinchi turda Yangi Zelandiya qiyinchiliksiz mag‘lub etildi (3:0). O‘zbekistonning gollariga Abbosbek Maxstaliyev, Igor Sergeyev va Diyor Turopov mualliflik qildi. Ikkinchi turda Xorvatiya bilan durang natija (1:1) qayd etiladi. Marko Livayaning goliga Sardor Rahmonov bitta gol bilan javob qaytardi.
Hal qiluvchi turda esa Urugvay O‘zbekistonni 4:0 hisobida mag‘lubiyatga uchratadi. O‘zbekiston 4 ochko bilan uchinchi o‘rinni egalladi va pley-offga yo‘l oldi (eng yaxshi uchinchi o‘rinni egallab). Nimchorak finalda Gretsiya O‘zbekiston yoshlarining raqibiga aylandi. Abbosbek Maxstaliyev, Igor Sergeyev va Sardor Rahmonovning gollari evaziga yunonlar taslim etildi.
Chorak finalda Fransiyaga to‘qnash kelgan O‘zbekiston 0:4 hisobida yengildi va musobaqani tark etdi. Qayd etish kerak, fransuzlar safida Alfons Areolya, Kurt Zuma, Samyuel Umtiti, Lyuka Din, Jordan Veretu, Pol Pogba kabi futbolchilar bor edi.
Yoshlar o‘rtasidagi Jahon chempionati — 2015
2015-yilgi mundialda O‘zbekiston terma jamoasi Germaniya, Gonduras, Fiji terma jamoalari bilan F guruhiga tushdi. Birinchi turda kutilmaganda Gondurasga 3:4 hisobida imkoniyat boy berildi. O‘zbekiston safida Dostonbek Hamdamov, Eldor Shomurodov va Zabihillo O‘rinboyev gol muallifiga aylandi. Ikkinchi turda esa Germaniya 3:0 hisobida g‘alaba qozondi.
Uchinchi turda O‘zbekiston Fijiga javobsiz 3 ta gol urdi. Bu safar ham Eldor Shomurodov va Zabihillo O‘rinboyev o‘z hisobiga gol yozdirib qo‘ydi. Uchinchi gol esa Mirjamol Qosimov hisobiga yozildi. Shu tariqa guruhda 3 ta jamoa bir xil 3 ochkodan qo‘lga kiritdi. O‘zbekiston esa to‘plar nisbati bo‘yicha qolgan jamoalardan yaxshiroq natija qayd etgan holda, ikkinchi o‘rin bilan pley-offga yo‘l oldi. Pley-offdagi ilk raqib Avstriya terma jamoasi bo‘ldi. Dostonbek Hamdamovning dubli O‘zbekistonni chorak finalga olib chiqdi. Chorak finalda Senegal jamoasi bilan to‘qnash kelgan o‘zbekistonliklar 0:1 hisobida mag‘lub bo‘ldi va musobaqani tark etdi.
Yoshlar o‘rtasidagi Jahon chempionati — 2023
Ravshan Haydarov shogirdlari Indoneziya maydonlarida 20-maydan 11-iyunga qadar o‘tkaziladigan turnirda ishtirok etish huquqini qo‘lga kiritdi. Sakkiz yillik tanaffusdan keyin o‘zbekistonlik yoshlar xalqaro maydonda yana bir bor tarix yozishga harakat qilib ko‘radi.
Jahon chempionati yo‘llanmasi naqd qilindi, endigi navbat O‘zbekiston mezbonligida o‘tayotgan Osiyo Kubogiga zafar quchishga.
Izoh (0)